Pêro dinya de janê Cod-19î roje bi roje vila beno û hûmara mergî zêdîyena. Vîrus Tirkîya rê zî bi giranî tesîr keno. Wekîlê HDPyî yê Riha Omer Ocalanî derheqê tedbîranê Riha, tepişteyan û polîtîkayanê hukmatî yê Kurdîstanî de ANFyî reyde qisey kerd.

Ocalanî vat: ''Sey her wextî dewlete bi hawayêkê cîyayî nêzdîyê kurdan bena. Nêweşxaneyanê herême de ca çin o ke merdim nefes bigêro. No zî beno semed ke vîrus bila bibo. Semedo ke tedbîr nêame girewtene rewşa nêweşxaneyan zaf xirab a. Nêweşxanê Riha qîm nêkenê. Hemwelatîyanê ma ra tay kesî Umre ra ameyî la bêkontrol kewtî mîyanê komelî. Taxêka Bêrecûkî de hemwelatîyêk Korona ra merd. Eşkerayîyê wezîrê weşîye biguman ê. Eşkerayîyê înan zî mojnenê ke Kurdîstan de tedbîr nêame girewtene. Şarê Riha nika zere de yê û nêeşkenê debarê xo bikerê.

Nika cayê tewr bitehlukeyî zîndan ê. Rojdem de qanûnê înfazî esto. Se ra 90î yê tepişteyê sîyasîyî kurd ê. Coka AKP-MHP nêwazeno sîyasetmedarê kurdî wa azad bibê. Nê qanûnî de têdûştîye çin a. No bi hawayêkê eşkerayî dişmenîya kurdan o. Tepişteyî mîyanê şert û mercanê xiraban de yê û weşîya înan hol nîya. Nê merdimî binê berpirsîyarîya îqtîdarî de yê. Ganî pêro cade bêrê veradayene.

Zîndanê Îmraliyî zî binê rîskî de yo. Şarê Kurdîstanî Rayber Abdullah Ocalan sey îradeyêk vîneno. Birêz Ocalan 21 serrî yo ke Îmrali de yeno tepiştene. Korona ra zîndanê Îmraliyî binê rîskî de yo. Ganî dewlete na şaşîya xo ra abigêra û cade şert û mercê Îmraliyî baş bikera. Ma Ocalanî ra xebere nêgênê, naye ra ma biqesawet ê. Ganî Tirkîya goreyê qanûnê xo û qanûnê mîyanneteweyî têbigêra. Ganî dezgehê sey CPT wezîfeyê xo bîyarê ca. Ganî CPT vera nê zulmî bivejîyo. ''