Wekîlê HDPyî Omer Ocalanî rayraşîyayîşê HDPyî, tecrîdê Îmraliyî û meseleya yewîya kurdan ANFyî rê ercnayî.

Omer Ocalanî îfade kerd ke Tirkîya de pero wareyan de teda û şîdetêko pîl esto û serkêşê nê şîdetî zî îtîfaqê AKP-MHPyî yo ke tede Ergenekon, Avrasya, rêxistinê xorinî yê sey gladioyî ca gênê. Omer Ocalanî ard ziwan ke 5 serran ra nata vera kurdan zulm û polîtîkaya çinkerdişî yenê kerdene la ê sey HDP demokrasî de israr kenê û bi taybetî seba meseleya kurdan meseleyanê pîlan de tewirê demokratîkî yê Abdullah Ocalanî xo rê sey esas gênê.

Omer Ocalanî vat: ''Dewlete mabênê serranê 2012 û 2015î de seba prosesê çareserîye Birêz Ocalanî reyde masayêke de ronişte û Birêz Ocalan asta tewr berzêre de sey muxatab ame dîyene. Dewlete pê çinkerdişê nê prosesî aql, nêzdîbîyayîş û şarê xo rê xîyanet kerd. Çareserîya meseleya kurdan de têna Birêz Ocalan muxatab o. ''

Omer Ocalanî da zanayene ke meseleya kurdan meseleyêka 100 serre ya û 'Planê Şark Islahatî' yê Îsmet Înonuyî hetê Tayyîp Erdogan ra Rojawan, Şingal û çar parçeyanê Kurdîstanî de yeno caardene. Omer Ocalanî vat: ''Çarçewa nê planî de Vakurê Kurdîstanî sey laboratuwar yeno xebitnayene. Ma pê bawer ê ke na mesele hetê Birêz Ocalanî ra do bêra çareserkerdene. HDP na babete de do rol û mîsyonê xo bîyaro ca. Meseleya kurdan meseleya bingeyî ya, xeylêk meseleyê ekonomîkî û komelkîyî zî netîceya meseleya kurdan a. Dewlete serranê 1990an û 2000an de pê formatanê cîya-cîyayan xo îfade kerdêne û nika zî sey tirk-îslam xco îfade kena. Dewlete binê nameyê ummetî de wazena kurdan erjanê xo ra, erjanê xo yê neteweyîyan û meşrûyan ra dûrî bivisna la şaşitîye kena. Kurdî hînî warê mîyanneteweyî de wayîrê sîyaset û vatişan ê. Kurdan Rojawan, Vakur û Başûrê Kurdîstanî de bedelê pîlî dayî û xo wina mojna ra.''

Omer Ocalanî bale ante hêrişanê vera Mexmûr û Şingalî ser û vat: ''Beno ke hetê îdeolojî û bawerîye ra kurdî wayîrê fikran ê cîyayan ê la ganî babeta yewîya neteweyîye de pîya têbigêrê. Binê sîwana demokrasîyî de ma do bingeyê erjan ê neteweyîyan ser o bibê yew û têkoşîn bikerê.''

Omer Ocalanî seba qedînayîşê tecrîdê vera Rayberê Şarê Kurdî Abdullah Ocalanî veng da û vist vîrî ke Tirkîya pê kerdişanê xo Qanûnê Bingeyî binpay kena. Omer Ocalanî vat: ''Ma her rey vanê ma Tirkîye ra holîye yan zî nêzdîbîyayîşêkê taybetî nêwazenê. Tecrîdê vera Birêz Ocalanî mezgê kurdan de ca beno. Na mesele pê 20 deqayan telefon de qiseykerdişî çareser nêbena. Ma pêvînayîşanê keye û vaûkatan zî sey wedaritişê tecrîdî qebul nêkenê. Çunke tecrîdê vera Birêz Ocalanî şexsê ci de vera şarê kurdî yeno kerdene. Ma naye qebul nêkenê.

Fikr û paradîgmaya Birêz Ocalanî her cayê Kurdîstanî de vila bîyê. Pê na felsefe cuye her ke şino zîl dana. Tecrîdê Birêz Ocalanî zêdînayîşê hêrsê kurdan ê vera dewlete û sîstemî ra ber çîyêkî rê nêbeno.''