Onlu: Pê rayîrê pezkovîyan bawerîya Dêrsimî yena hedefkerdene

Wekîlê HDPyî yê Dêrsimî Alîcan Onluyî îfade kerd ke pê qetilkerdişê pezkovîyan kultur û bawerîya Dêrsimî yenê hedefkerdene. Alîcan Onluyî seba paştdayîşî veng da.

Dêrsim de binê nameyê ''sporê turîzm û seydwanîye'' de seba qetilkerdişê pezkovîyan îhaleyêk ronîya. Pezkovîyî bawerîya Dêrsimî de sey heywanê fîrazî yê.Wekîlê HDPyî yê Dêrsimî Alîcan Onluyî derheqê mesele de eşkerayîyêka çapemenîye daye. 

Onluyî vat: ''Cografyaya Dêrsimî bi serran o ke binê hêrişanê sîstematîkan ê dewlete de ya. Cografyaya Dêrsimî nika zî binê nameyê 'turîzmê seydwanîye' de hedefê qirkerdoxan de ya. Kultur, bawerî, ziwan û xozaya kurdan ra dima nika zî heywanê fîrazî hedefê dişmenan de yê. Îqtîdar dişmenê pêro gandaran o. Bawerîya Rayê Heqî ya Dêrsimî de pêro xoza fîraz a. Pezkovîyê Dêrsimî fîrazê bawerîya Rayê Heqî yê. Pê qirkerdişê pezkovîyan bawerî û kulturê Dêrsimî zî yenê qetilkerdene.''

Onluyî qiseykerdişê xo wina dewam kerd: ''Ez venga şar, roşnvîr, hunermend û dezgehanê Dêrsimî dana ke pê paştayîşî vera hêrişanê sîstematîkan têkoşîn bikerê.''

Wekîl Alîcan Onluyî seba ke îhale batal bibo Wezaretê Zîret û Daristanan rê waştişnameyêk da.