Gerîla TVyî 9ê tebaxe de dîmenê operasyonê şorişgêrî yê Girê Cûdîyî weşanayî. Na çalakîya yewine nîya ke gerîlayan pê operasyonê şorişgêrî artêşa tirke rezil kerda.

Gerîlayê ke rûmetê kurdan ê, 39 serrî yo nê erdî de mîsalanê fedayîtîye mojnenê. Nê prosesî de ke tecrîdê vera Rayberê Şarê Kurdî Abdullah Ocalanî, sûcê şerî, îşxalî, destbendkerdiş û tepiştişî zêde yê kurdîstanijê ke nê dîmenan seyr kenê do bineyk bibê zerrîhîra.

Her hela nê dîmenan tarîxî yê. Na çalakîye çalakîyêka winayên a ke gerîlayan kedêka pîle daya ci, pê zeka û taktîkî plan kerda û pê fedayîtîye arda ca.

Bi taybetî dîmenê operasyonê şorişgêrî yê Girê Cûdîyî yê 9ê tebaxe karakterê şerê koyanê Kurdîstanî eşkera kerd. Wexto ke artêşa tirke pê xo zaf bawer bîya na çalakîye ameye kerdene. Wextê çalakîye de leşkerê îşxalkerî nêeşkayî sereyê xo berz bikerê. 

Wexto ke leşkeran sohbet kerdêne gerîlayî şîyî heta verê înan. Dîmenî tewr zaf zûra 'adirê tacîzî' ya dewleta tirke eşkera kenê. Dîmenan de aseno ke na çalakîye bi hawayêkê profesyonelî ameya plankerdene. 

Operasyonê Girê Cûdîyî serî ra heta binî terzê pirodayîşî yê gerîlatîya modernîteya demokratîke yo. Pêro hêzê dişmenî yê teknîkî û zirxê ci bi şîarê 'Teknîko tewr pîl merdim ê' ameyî pûçkerdene. Seba ke ma karakterê na çalakîye fam bikerê ganî gerîlayê na çalakîye zî nêzdî ra bişinasnê.

Dîmenan de tewr zaf terzê gerîlayan ê cinîyan, cesaret û koordînasyonê înan bale ancenê. Çalakîye de hêverî cinîyî bomba erzenê leşkeranê tirkan ser û şinê serê înan. Gerîlayê cinîyî hetêkî ra şer kenê hetêkê bînî ra zî embazanê xo pawenê û koordîne kenê.

20ê temmuze ra nata çalakîyê YJA-Starî benê nîşaneya vejîyayîşêkê neweyî. Artêşa tirke ya ke hetê tersî ra DAÎŞî ra cîya nîya, rojanê verê ma de zî do nê cinîyan de têrî bibê. Çunke Girê Cûdîyî kelaya xoverdayîşî ya cinîyan a, mekanê şerwananê Zîlane yo.

Sîstem pê şîarê ''Hêverî bidê cinîyan ro'' Vakurî ra heta Rojawan û Başûrî cinîyan keno hedef. La gerîlayê YJA-Starî zî wina vanê: ''Ma do hêverî bidê şima ro.'' Yanî ê do hêverî bidê artêşa şima ya faşîste, cînsîperest, tecawuzkere, kolonyalîste û îstîsmarkere! Ewro gerîlayê YJA-Starî pê têkoşîn û serkêşîya xo hêvîyê cinîyanê dinya yê. 

Artêşa tirke ya îşxalkere çalakîye ra dima war da bombayan ver. Artêşa îşxalkere her roje pê teyara û pêro îmkananê xo Girê Cûdîyî dana bombayan ver. La nê dîmenanê çalakîye ra dima merdimî vanê ke ê çend bidê piro zî ruhê gerîlayan qetî do nêmiro.