Operasyonê qirkerdişî sîyasî yo ke vera KCDyî yeno rayraberdene Kurdîstan û Tirkîya de ame şermezarkerdene.

Îstanbul de şaro ke Beyoglu de  ame têhet waşt ke Tunelê Taksîmî de eşkerayîye bido. Polîsan hêrişê HDPyijan kerd. Hemserekê HDPyî yê Îstanbulî Erdal Avci û Elîfe Bulut zî tede 19 kesî bi derbkerdişî ameyî destbendkerdene.

Parlamenterê HDPyî Musa Piroglu û Zuleyha Gulum vera hêrişê polîsan Kuçeyê Îstîkalî de reyra şîyî û veng kerd şarî. Rixmê hêrişê polîsan şar û parlamenterî heta verê banê HDPyî rayra şîyî. Pirogluyî ke tîya qisey kerd vat: ''Ê se kenê wa bikerê ma do peyser game meerzê.Bi zorê polîsan wazenê vengê ma bibirnê. HDP adresê çonêdayîşî yo. Vera hêrişê înan ma do çirey çok nêdê. HDP şar o, şar tîya de yo.''

Amed de zî bî tewrbîyayîşê temsîlkaranê KCD, DBP, HDP, TJA û Baglar de eşkerayîyêke ameye dayene. Polîsan warê çalakîye girewte binê ablûqa. Eşkerayîya hempare de ame vatene ke bi operasyonanê qirkerdişê sîyasîyî wazenê verê têkoşînî bigerê û şarî rê peyser game bidê eştene la  rixmê heme hêrişan ê do têkoşînî pîlêr bikerê. Eşkerayîye de bale ameye  ser antene ke peynîya îqtîdarî bîya nizdî û ame vatene ke tersê xo ra hêriş kenê ke emrê xo derg bikerê la hînî vera nê tekoşînî xelisyayîşê çîn o.

Reyna Wan, Adana, Mersin û de zî bi çalakîyan operasyonê qirkerdişê sîyasî yê vera KCDyî ame şermezarkerdene û mesajê pîlkerdişê têkoşînî ameyî dayene.