Qezaya Geverî ya Colemêrgî de artêşa tirke ya îşxalkere 24ê temmuze de dewanê Tilorana Jêr, Tilorana Jor, Pagê, Mitirban, Meşkan, Mûşan, Kendalok û Wargenima de operasyonêk dabi destpêkerdene.

Çarçewa operasyonî de bi seyan leşker, wesayîtê zirxînî û helîkopterî sewqê wareyanê Tajdîn, Sipêrêz, Omerê Dağı, Pagê û Topizava ameyî kerdene. Bi taybetî şewa dişemeyî vengê çekan eşnawîyayêne. Xeylêk qoricîyî zî sewqê herême bîyî.

Dewa Tiloran de bêrîwanî hetê leşkeran ra ameyî astengkerdene û şiwaneyêk zî ame berdene bi warê operasyonî. Şiwaneyê bi nameyê Şîyar Dermîrî herême de mehsûr mend û destûr nêdîyeno ke çew şêro hetê ci.

Leşkeran qedexe kerd ke dewijî şorê wareyan û şiwaneyê bînî zî raştê îşkenceyî ameyî. Pêzê şiwaneyan vila bîyî la leşkerî nêverdenê ke dewijî bigêrê pêzê xo.

Hetê bînî ra qezaya Xîzanî ya Bedlîsî de 12 rojan ra nata dewanê Xûlepûr û Kekulanî de operasyono leşkerî û qedexeyê tebervejîyayîşî dewam kenê. Herême hetê helîkopteran ra dîyena bombayan ver û tay waran de şewat vejîya. Leşkerê tirkî zerar danê axpînanê şarî û her ca de dafika kamera û mobeseyan ca kenê.

Vizêrî ra nata dewî dîyenê bombayan ver. Dewijan pare kerd ke operasyon dewa Bestî de bîyo giranêr.