Kolektîfê Awe yê Bursa çend rojî verî karkerê serrwextî zîyaret kerdbî û goş nabi meseleyanê înan ser. Kolektîfî ra Fîgene Ovat derheqê babete de ANFyî rê qisey kerd.

Ovate da zanayene ke cayê kampanê karkeran de binawanîye çin a, meseleyê hîjyen, perwerde û xizmetanê umûmîye zêde yê. Ovate vat: ''Tay cayan de ne kampî ne zî xeymî est ê û karkerî baxçeyan de menanê. Xeymî û kampî zî goreyê şertanê ciwîyayîşî nîyê û nînan de meseleya asayîşî est a. Ma dî ke awa înan a şimitişî zî hîjyenîk nîya. Coka domanî vera vera pê nêweşîyanê enfeksîyonî kewenê. Banyo û tuwaletî akerde yê, mahremîyet çin o. Dormeyê xeyman de mêsî zaf ê ke nê nêweşîye anê. Reyna marê derûdorî seba domanan tehluke yê. Karkerê serrwextî roje de 14 saetan xebitîyenê û yewmîyeya înan qasê 400 lîra ya. Nê pereyî ra se ra 10î yeno dîyene kesê bi nameyê 'dayibaşi.' Pereyê resayî, xida, awe û ceyranî ûsn aîdê karkeran ê. Yanî peynî de karkerî meaşê asgarîyî ra kêm gênê.''

Ovate pê hesna ke seba ke asayîşê karkeranê serrwextî çin ê, her serre domanê nînan dinyaya xo bedilnenê la nê mergî yenê nimnayene. Ovate vat: ''Bi taybetî mergê domananê kênayan yenê nimnayene. Medya de nê mergî sey 'xokiştişî' yenê mojnayene. Domanê karkeranê serrwextî zî baxçeyan de xebitîyenê. Sey dadî û babîyanê xo heqê înan zî çin ê. Ma zîyaretanê xo de dî ke domanê astengdarî zî est ê û dadîyê înan hem xebitîyenê hem zî miqatê domananê xo benê. Heyf ke karkerê serrwextî yê cinîyî di reyî raştê kedwerdişî yenê. Nê cinîyî raştê şîdetî zî yenê.''

Ovate dîyar kerd ke netîceya polîtîkaya bêerdverdayîşî ya vera kurdan de kurdî bîyê kerdoxê karkeranê serrwextî. Ovate vat: ''1950an de vera kurdan polîtîkaya bêerdverdayîşî ameyêne kerdene. Serranê 90an de zî reyna çarçewa polîtîkayanê şerê taybetî de kurdî erdê xo ra ameyî surgunkerdene. Ewro tewr zaf kurdî şinê karkerîya serrwextî. Seba ke Tirkîya de nefret û nîjadperestîye zêdîyenê tehlukeyê vera karkeranê serrwextî yê kurdan zî zêdîyenê. Kurdî, multecîyî û romanî nê baxçeyan de xebitîyenê û raştê nê kerdişan yenê. 

Ganî meseleyê nê karkeran bêrê çareserkerdene. Ma sey Kolektîfê Awe tim hetê karkeranê serrwextî de yê û kenê ke meseleyanê înan rojdem bikerê.''