Hemserekê HDPyî yê Colemêrgî Lokman Ozdemîrî derheqê xebatanê weçînitişî û asayîşê sindoqan de ANFyî rê qisey kerd:

Ozdemîrî vat: “Ma aşmêke verî dest pê xebatanê weçînitişî kerd. Dewe bi dewe, mehla bi mehla, keye bi keye xebatan rayra benê. Ma hedef kenê ke Colemêrg de hîrê wekîlan zî bigêrê. Akerdişê buroyan û xebatê ma sey mîtîngan yenê kerdene. Şarê ma cadê Partîya Çep a Keske qebul kerd. Şarê ma wazeno ke wa hinda îqtîdaro faşîst ê AKP-MHPyî şiro. Şar wazeno ke wa meseleya kurdan bêro çareserkerdene û krîzê ekonomîkî biqedîyo.”

Lokman Ozdemîrî vist vîrî ke îqtîdarê AKP-MHPyî heq, huqûq û edalet werte ra wedarit û wina dewam kerd: “Ziwan, kultur, bajar û dewê kurdan qedexe kerdî. Nê îqtîdarî teberê zilm, şer, tepiştiş û operasyonanê sîyasîyan de xebatêka bîne nêkerde. Şarê ma zî çirey xoverdayîş canêverda. Vera rejîmê faşîstî hêzê şarê ma çend şi bi gird û do  girdêr bo. Kam ke şino sindoqan ser, wa destê xo bido vîjdanê xo ser; kam ke edalet, azadîye û haştîye wazeno wa morê xo bidê binê Partîya Çep a Keske ro.”

Ozdemîrî ard ziwan ke semedê asayîşê sindoqan çîyo ke deste înan ra yeno do zafêrê ci bikerê û vat: “Şarê ma do badê şuxulnayîşê rayanê xo, semedê pawitişê rayanê xo, do sindoqan cameverdo. Heta ke sindoqî biresê cayê xo ma do wayîrê sindoqan bivejîyê.  Eke ma wayîrê sindoqan mevîyê, ê do rayan bidiznê.  Ma weçînitişanê verênan de zî dî ke senî rayan diznenê.  Gerek ma miheqeq wayîrê sindoqan bivejîyê. Embazê ma yê wezîfedarê sindoqan heta ke sindoqî  biresê cayê xo gerek cameverdê. Verî zî cendirmeyan vatbi  ‘sindoqan ma benê’ la ma desûr nêdabi. Gerek ma pîya bi sindoqanê xo şorê.”