Fermandaranê YJA-Starî ra Hezîle Ozgur ANFyî reyde derheqê şerê taybetî yê dewleta tirke de qisey kerd. Qiseykerdişê Hezîle Ozgur ra beşêk wina yo:

''Dewleta tirke seba menfaatanê xo çapemenîye xebitnena. Her çend bin bikewa zî wina mojnena ke seke serkewte ya û pê çapemenîye şar xapînena.  Dewleta ke fuhuşî ra heta kundoxan her çî seba menfaatanê xo xebitnena, pê rayîrê medya xo sey xelisnayox mojnena. Pê efû zî faîlê tecawuz û kundoxan vera dayî. Eke îradeyo azad û fikir bivejîyê werte hêzê dewlete nêmaneno. coka dewlete her ca de şîdet kena û tepişteyanê sîyasîyan vera nêdana.

Armancê şerê taybetî her çî ra ver asîmîlasyon o. Dewlete demokrasî qebul nêkena, tekperestîye kena. Seba nînan zî medya xebitnena. 

Pê şerê taybetî yeno armanckerdene ke bawerîya şarî ya seba PKKyî bêra pûçkerdene. Propagandayê sey 'Ma PKK qedîna, koyan de hendek gerîlayî mendî' xizmetê ney kenê.  Naye ra tay kesan verê bînaya HDPyî de nişnenê ro û kenê ke nê kesî vajê PKKyî domanê înan remnayê.  Seba ke şar bitersnê, perwerî û bawerîya seba gerîlayan birijnê her roje propaganda kenê.

PKK de cinîyî rayberîya şorişî kenê û nê zî pê ney hesîyayî. Serekatîye tim vana ke cinîyî ganî sey yew cîns nê sey yew netewe bêrê dîyene. Dewlete naye ra vera cinîyan şîdet kena û pê ziwanê gerîlayan ê cinîyan propaganda kena. Dewlete cinîyan hedeg kena çunke eke cinîyî qels bibê PKK zî qels beno. Wextanê peyênan de zî dewlete polîsan, notiran û leşkeranê cinîyan dana vernî. Ma zanenê ke ma seba çita tekoşîn kenê. Ma seba heqanê xo, azadî, nasname, kultur û ziwanê xo têkoşîn kenê. La nê cinîyê notîrî seba çita şer kenê?

Ganî ma polîtîkaya şerê taybetî ya dewlete hol fam bikerê. Şarê kurdî asta neteweyîye de hedefê hêrişan de yo. Eke ma sey cinî, camêrd yanî sey netewe hîşmendîya xo xurt bikerê ma eşkenê pêro kayanê dewlete eşkera bikerê. Pêro çalakîyê ma vera na nêheqîye yenê kerdene. Eke wijdanê merdiman kor nîyo ney vînenê.

Ma venga her kesî danê ke vera polîtîkayanê zûrayînan ê dewlete hîşyar bibê. Ciwanê ma wa verê xo bidê koyan, hîşmendîya dewleta tirke ra xo bixelisnê. Cayê azadîye koyî yê.

Ganî pêro kurdî ça de benê wa bibê vera nê metodanê şerê taybetî yê dewlete xo bipawê û tewirê xo bimojnê.''