Kombîyayîşê NATOyî ra dima mabênê Erdogan, Serekkomarê Fînlandîya Sauli Ninisto, Serekwezîra Swêdî  Magdelena Andersson û Sekreterê Pêroyî yê NATOyî Jens Stoltenbergî de 28ê hezîrane de memorandumêk ame îmzakerdene. Naye ra dima seba endamîya wird welatan a NATOyî veng dîya. 

Endamê Komîsyonê Têkilîyanê Karanê Teberî yê HDPyî û Wekîlê HDPyî yê Amedî Hişyar Ozsoyî derheqê babete de ajansê Mezopotamya rê qisey kerd. 

Ozsoyî vist vîrî ke Erdoganî no memorandum sey nîşaneya serkewtişî mojnayo la raştîye wina nîya. Ozsoyî bale ante ser ke memorandum de rixmê xîretanê Erdoganî zî YPG û PYD sey 'rêxistina terorî' nêameyî nuştene la ame vatene ke hetkarîye do nêra dayene înan. 

Ozsoyî vat: ''Swêd nêeşkeno goreyê waştişê Tirkîya hemwelatîyanê xo teslîmê Tirkîya bikero. Eke Swêd mîsal biwazo Ragip Zarakolu teslîmê Tirkîya bikero hînî hukmat keweno. Yanî na mesele hende rehet nîya. Nê memorandumî reyde hînî Swêd û Fînlandîya de zî meseleya kurdan est a. Erdoganî xîret kerd ke pê karta vetoyî Bidenî ra zî tay tawîzan bigêro. La Bidenî bi westatî vat ke 'na mesele meseleya ma nîya. Şima mabênê xo de safî bikerê.'   Şerê Ukrayna-Rûsya ra dima girîngîya Tirkîya zêdîyaye. Nika welatê Ewropa vanê 'ma dîzaynêkê neweyî bikerê.' La Erdogan vano 'Verî destûr bidê mi ke ez şora Rojawan de tay kurdan bikişa.' Ê do heta weçînayîşî goş nêdê Erdoganî û tira bawer mekerê.  

Erdoganî dişmenîya xo ya vera kurdan ra meseleya kurdan vurnaya kerda meseleyêka globale. Meseleya kurdan ra beno ke hukmatê Swêdî bikewo.  Ma do netîceyanê memorandumî bivînê. Xora 40 serrî yo bi hetkarîya NATO, Îngilîstan û Amerîka şerê vera kurdan yeno kerdene. Hînî dezgehê Swêdî do seba meseleya kurdan pê bikerê, beno ke waştişanê meşrûyan ê kurdan hîna zaf bîyarê rojdem, komelê înan do derheqê kurdan de hîna zaf agahîyan bimuso. Ganî ma zî na rewşe sey  firsendêkî bişuxilnê.

Ambargoyê çekan ê Swêd-Fînlandîya yê vera Tirkîya zaf girîng nêbi. Çunke înan cara çekî rotêne. Erdogan nika meseleya kurdan milîtarîze keno û meseleya kurdan vurneno meseleyêka mîyanneteweyîte. 30 endamê NATOyî ronişenê û qala Rojawan û kurdan kenê. Erdogan xîret keno ke hêzanê mîyanneteweyîyan kom bikero û seba hêrişê vera kurdan bingeyêkî amade bikero.''