9ê çeleyê 2013yî de payextê Fransa Paris de ronayoxanê PKKyî ra Sakine Cansiz (Sara), Temsîlkara KNKyî ya Parisî Fîdane Dogan ( Rojbîne) û Endama Têgêrayîşê Ciwanan ê Kurdan Leyla Şeylemez (Ronahî) ameyî qetilkerdene. Bi belgeyan ame tesbîtkerdene ke no qirkerdiş hetê dewleta tirke ra ame plankerdene û bi destê Omer Gunayî ame kerdene. Rixmê nê dewa de averşîyayîş nêbi.

Nizdê des serran dima 23ê kanûna 2022yî de verê Merkezê Kulturî yê Ahmet Kayayî yê Parisî de hêrişê diyînî de Endama Konseya Rayberdişî ya KCKyî Emine Kara ( Evîne Goyî), Têgêrayîşê Kulturî ra Mîr Perwer (Mehmet Şirin Aydin) û welatperwero kurd Abdurrahman Kizil ameyî qetilkerdene.

Têgêrayîşê Cinîyan ê Kurdan ê Fransa  (TJK-F) û Konseya Kurdanê Demokratîkan ê Fransa (CDK-F) bi eşkerayîya nuştekîye da zanayene ke serrgêra wird qirkerdişan de bi waştişê edalet û zelalîye do rayraşîyayîşî bêrê kerdene. eşkerayîye de  ame vengdayene ke wa derheqê nê dewayan de belgeyê servîsanê îstîhbaratî bêrê parekerdene, ''sirrê dewlete'' bêro wedaritene û wa profîlo şikdar ê  kiştox William Maletî bêro eşkerakerdene.

Eşkerayîye de dîya zaneyene ke semedê protestokerdişê wird qirkerdişan 23ê kanûna 2023yî û 6ê çeleyê 2024î  do rayraşîyayîşî bêrê kerdene û semedê tewrbîyayîşê çalakîyan ame vengdayene. Goreyê eşkerayîye çalakîya 6ê çeleyî do pêro Ewropa de bêro kerdene.