Îtîfaqê Kede û Azadîye Paris û Zurih de mîtîngî kerdî û no mesaj da: ''Ma do to serekkomar nêkerê, ma do pîya bivurnê.''

Paris

Şaristanê Parisî yê Fransa de bi hezaran kesî amayî têhet. Namzetê Amedî yê Partîya Çep a Keske Berdan Ozturk û Hemvervatoxa Partîya Çep a Keske Çîgdeme Kiliçgun Uçar zî tewrê mîtîngî bîyî. Mîtîng de tim sloganê  ''Ma do to serekkomar nêkerê'' ame vatene. Destpêk de nameyê Koordînasyonê Weçînayîşî yê Îtîfaqê Kede û Azadîye yê Parisî ser o Vedat Bîngolî qisey kerd û venga şarî da ke 27ê nîsane de Paris de şoro sindoqan ser.

Hemvervatoxa Partîya Çep a Keske Çîgdeme Kiliçgun Uçara ke bi vîdeoyêkî tewra mîtîngî bîye mesajê ''Ma do pîya vurnayîşî bidê destpêkerdene'' da.

Berdan Ozturkî zî îfade kerd ke nê weçînayîşî seba roşnîkerdişê Qirkerdişanê Parisî girîng ê û vat: ''Seba qedîyayîşê îqtîdarê AKP-MHPyî îradeyê şarî do bibo çare. Çareserîye Amerîka û Rûsya de nê. Adresê çareserîye Îmrali de yo.''

Deza Amed, Kewana Zêrîn û Farqîn Azad vejîyayî sehne ser. Girseyan mîtîng de pîya govende girewte.

Zurih

Şaristanê Zurihî yê Swîsre de sere de Hemserekê CDK-Syî, ATÎKî, FEDA û ESPyî xeylêk kesî tewrê mîtîngî bîyî. Nameyê dezgehan ser o Hemsereka CDK-Syî Selma Surer qisey kerd û vat: ''Ganî her kes şoro sindoqan ser û raya xo bidê Partîya Çep a Keske. Ma mabênê 29ê nîsane û 7ê gulane de raya xo bidê.''

Dima hunermend Akin Ogul vejîya sehne ser û deyîrê kirdkî, kirdaskî û tirkî vatî.

Hemserekê verênî yê DBPyî Mehmet Aslanî mîtîng de qisey kerd û bale ante tecrîdê vera Rayberê Şarê Kurdî Abdullah Ocalanî ser. Arslanî vat: ''Rayber Apo bi serran o tecrîdkerde yo. Tecrîdî reyde hêrişê vera kurdan zî zêdîyenê.''

Sîyasetmedar Alî Şîmşekî pare kerd ke servistişê Partîya Çep a Keske erkê her kesî yo. Şîmşekî vat: ''Ganî ma bi na hişmendî xebata weçînayîşî bikerê. Seba ke raya xo bidê Partîya Çep a Keske, ganî ma pêro kesan îqna bikerê.''