Partîya Çep a Keske startê mîtînganê xo yê weçînitişê 14ê gulane Colemêrg de da. Hemserekê Pêroyî yê DBPyî Bayindir Keskîn, Hemsereka Pêroyî ya HDPyî Pervîne Buldan û vervatoxê Partîya Çep a Keske Îbrahîm Akin tewrê mîntîngî bîyî.

Mîtîngo ke otogarê bajarî de ame kerdene, rixmê varayîşî bi hezaran  kesî tewrê ci bîyî. Warê mîtîngo ke bi  kincanê herêmîyan bale ante xo ser bi beyraqanê Partîya Çep a Keske xemilîya. Wextê mîtîngî de sloganê sey  “Bijî Serok Apo”, “Jin, jiyan, azadî”, “Bijî berxwedana zindanan”, “PKK şar o, şar tîya de yo” ameyî vatene. 

Badê rezgirewtişî verî Başake Demîrtaş şar silam kerd û mesajê Hemserekê Pêroyî yê HDPyî yo verên Selahattîn Demîrtaşî ame wendene.

Mesajê Demirtaşî wina yo: “Ma Colemêrgî ra rayanê rekoran pawenê.  Ma verî do nê îqtîdarî bişawê û dima ra birînanê xo bipêşê. Ma do cehd bikerê ke meseleya kurdan meclîs de bêro çareserkerdene. Semedê nê gerek Partîya Çep a Keske bi tewirêkê xurtî meclîs de ca bido xo.  Gerek ma bi ruhê yewîya neteweyîye têbigêrê. Wext wextê mewkî û menfeatî nîyo.  Ez veng dana heme şarê ma ke wa paştî bidê partîya xo û derûdorê namzedanê xo de bêrê têhet. Êyê ke bi namzedanê xoseran kewtî rayîr, ez veng dana înan; şima semedê ma erjîyaye yê, wina mekerê.  Bêrê Partîya Çep a Keske de bigurîyê.” 

Keskîn Bayindir nê vatî:  “No weçînitiş û tewirê şima mojnenê ke ma do fermanê nê îqtîdarî tîya ra binusê.  Vanê ke halê kurdan nêmendo. Biewnê şarê ma, ciwan û dayîkê ma tîya de yê. No weçînitiş zaf hesas o. Şarê ma qerarê xo dayo. Ma do nê weçînitişî de faşîzmê AKP-MHPyî  çîn bikerê û Birêz Ocalanî bikerê azad. Ewro kurdî têna nîyê, pîya bi mutefîk û îtîfaqanê xo rolêkê muhîmî genê. Ma do pîya bi dostane xo ser bikewê.”

Pervîne Buldan wina qisey kerd: “Colemêrg de ma do hîrê wekîlan zî bîgêrê. Ma pêro zanê ke no îqtîdar dişmenê kurdan o. Xora çirey dişmenîya xo nênimnenê. Tim hêrişê ziwam, nasname û erjanê kurdan kenê û îradeyê înan çîn hesibnenê. Şarê ma do wayîrê îradeyê xo bivejîyo û nê îqtîdarî bido war. Wa dişmen nê hole bizano ke; kurdî tim dersa zalimanê danê ke înan înkar kenê. 21 serrî yo bêhuqûqîye kenê, talan kenê, ameyoxê ciwanan û cinîya dizna. Bi ameyoxê ma kurdan kay kerd, polîtîkayê şer û tecrîdî ver ama şuxulnayî. La ma ne şer ne bêhuqûqîye û ne zî tecrîd çirey qebul kerd, do mekerê. Vanê ma meseleya kurdan çareser kerda. Eke şima mesele çareser kerda, qey  şima ziwanê kurdan qedexe kenê, qey şima îradeyê kurdan erzenê zîndanan. Şarê ma û Partîya Çep a Keske temînatê çareserkerdişê meseleya kurdan ê.”

Îbrahîm Akin zî nê vatî: “ No mîtîngêko tarîxî yo.  Ma tîya ra kenê ke seserra newî ya ameyoxî ronê.  Ma do  çînhesibnayîşê bi serran biqedînê û wisarêkê neweyî rê bibê aye. Ma yew welatî wazenê ke heme nasname û bawerîye tede azad biciwîyê û semedê nê xîret kenê. Nê welatî de meseleya kurdan est a. Tîya bi hezaran kesî ameyî kiştene. Ma do hesabê nînan bipersê. Têna şawitişê înan nêvejeno, gerek ma çîyêkê neweyî ronê. Ma îtîfaqê neweyî naye ro ke nê welatî bi demokrasîyî tacîdar bikerê. Gerek 14ê gulane de her kes wayîrê sandiqan bivejîyo.” 

Badê qiseykerdişan Azad Bedranî deyîrî vatî.