Teberê welatî de 3 mîlyon û 286 hezar û 786 kesî weçînayîşanê Tirkîya yê 14ê gulane de do raya xo bidê. Swîsre de zî 105 hezar kesî do raye bidê. Partîya Çep a Keske armanc kena ke weçînayîşanê 14ê gulane de rayanê zêdeyan bigêra. Weçînayîşê 2018î de tewr zaf rayî HDPyî girewtbî.

Endamanê Koordînasyonê Weçînayîşî yê Îtîfaqê Kede û Azadîye Selma Surer û Îsmaîl Kardaşî derheqê xebatanê xo yê weçînayîşan de ANFyî rê qisey kerd.

Selma Surera ke Hemsereka Konseya Kurdan a Demokratîke ya Swîsre ya zî, da zanayene ke înan amadekarîyê xo rewî ra kerdbî. Surere vat: ''Îtîfaqê Kede û Azadîye, dezgehê elewîyan, komeleyê êzidî û sûryanîyî mîyanê xebatan de pîya cagênê. Reyna dezgehê têgêrayîşê cinîyan zî hetêkî ra xebitîyenê. Ma hêvî kenê ke nê weçînayîşî do bibê fînal. Ma bi coşî xebatanê xo kenê ke ser bikewê.''

Endamê Koordînasyonê Weçînayîşî yê Partîya Çep a Keske yê Swîsre Îsmaîl Kardaşî dîyar kerd ke ê armanc kenê ke se ra 50ê rayan bigêrê. Kardaşî vat: ''Ma Merkezanê Komelê Kurdan de komîsyonê weçînayîşî awan kerdî. Ma komîsyono merkezî zî awan kerd. Swîsre de mabênê 29ê nîsane û 7ê gulane de, mabênê saetanê 09.00 û 21.00 de do sindoqî bironîyê. Zurih de zereyê hewteyî de 12 û peynîya hewteyî 14, Bern û Cenevre de zereyê hewteyî de 3 û peynîya hewteyî de 5 sindoqî bironîyê.

Peynîya hewteyî de zî Zurih de Partîya Çep a Keske do mîtîngêkê pîlî viraza..

Adresê ke tede rayî bêrê dayene wina yê:

1-Sersefîrîya Bernî, Lambachweg 33, 3006 Bern

2- Sersefîrîya Cenevre, 20 Route de Pre-Bois 1215 Geneve

3-Sersefîrîya Zurihî, Messe Zürich, Wallisellenstrasse 49, 8050 Zürich