Partîya Çep a Keske Xarpêt de namzedê bajarî Savaş Erdogan, Nurşate Yeşîl, Hadî Konar û Sultane Yaray dayî naskerdene.

Qezayanê Dep, Palî, Qovancîyan, Mîyaran û Xulamanî ra pê konvoyî  weriştî. Namzedi verê banê HDPyî yê Xarpêtî ra dest pê turê bajarî kerd. Şarî zaf eleqe mojna namzedan. Badê konvoyî namzedan û hemwelatîyan govende girewte.

Vervatoxê Partîya Çep a Keske yê Xarpêtî Îmam Demîrtaşî vat ê do îqtîdarê 22 serran bidê war û pîya ser bikewê û pîya bibedilnê.

Namzed Savaş Erdoganî vat: “ Îqtîdar têna xo û derûdorê xo zengîn keno. Wextê ci ameyo ke ma nînan rê vajê hinî bes o.” 

Nurşate Yeşîl zî bale ante têkoşînê Partîya Çep a Keske û partîyanê verênan ser û vat: “Heme îdarekarê partîya ma ameyî tepiştene la ma têkoşînî ra peyser game nêeşte. Ma wayîrê nê welatî yê û heqê ma es to ke ma nê welatî îdare bikerê.” 

Hadî Konar zî weçînitişê 14ê gulane sey referandûmî name kerdî û paştdayîş waşt.

Sultane Yaray zî vat: “Senî ke şima zî zanê, kurdî ça vengê xo vejê, ê heme hêzê xo ûca fînenê dewre ke kurdan çîn bikerê. Seba ke kurdan çîn bikerê, cehd kenê ziwanê înan çîn bikerê. Ma tîya ra vanê ke ma do bi reng û vengê xo ûca bê. Vanê Xarpêt heta ewroyî wayîrê xo nêvejîyayo la ez pê bawer a ke na rey Xarpêt do surprîzê tewr pîlî bikero. Ma do bi vengê xo beranê zîndanan abikerê.”