Tradîsyonê HEPî ra nata Xarpêt de têgêrayîşê kurdan wekîlîyêke zî nêviste destî. Partîya Çep a Keske wazena gamêka newîye bierza û tewr tay yew wekîlîye bivisna destî. Namzedanê Partîya Çep a Keske yê Xarpêtî derheqê babete de ANFyî rê qisey kerd.

Namzed Savaş Erdoganî ard ziwan ke Xarpêt herêma erdlerzî ya û şaristan de meseleya tewr pîle zî awankerdiş o. Erdoganî vat:  ''Ma do Xarpêt de seba çareserkerdişê meseleya awankerdişî bixebitê, têbigêrê. Tayî vanê ke ma do hetkarîya komelkîye bibirnê. Ma çareserîyêka mende fikirîyenê. Ma do kesî hewceyê hetkarîyan nêkerê.''

Namzede Nûrşate Yeşîl vat: ''Xarpêt de meseleya şîdetê vera cinîyan est a, mîqtarê cinîyan ê karkeran kêm a. Partîya ma de sîstemê hemserekîye est o û ma bi têdûştî nêzdîyê cinîyan benê. Coka verê partîya ma de sempatîyêka pîle est a. Cinîyê Xarpêtî wexto ke ma vînenê pê namzedanê xo yê cinîyan kêfweş benê. Xarpêt de meseleya bîne zî ekonomî ya. Seba cinîyan na mesele zî di qatêr giran a.''

Namzed Hadî Konarî vat: ''Ma şorê kamca polîsî tede yenê cakerdene. Bi nê hawayî merdiman û ma rê tedaya psîkolojîke yena kerdene. Bi serran o na rewşe wina ya. Ez bi serran o Xarpêt de mîyanê komelî de ya. Tim tîya de potansîyelê ma yê wekîlîye est bi. La narey ma hêvî kenê ke zaf wekîlîyan bivisnê destî. Ma seba ney xîret kenê.''

Weçînitoxa Partîya Çep a Keske Fîkrîye Çîçek pare kerd ke a kurd a coka paştî dana partîya xo. Çîçeke vat: ''Xêr ser o rayîrê ma akerde yo û ma do ser bikewê. Ma wazenê Tayyîpî bişawê. Meseleyê şarê ma nênê çareserkerdene. Zafê roniştoxê Xarpêtî kurd ê la heta nika wekîlîyêke zî ma nêvista destî. Eşkera yo narey ma do ser bikewê.''

Mehmet Kiliçtepeyî vat: ''Sîstem bi serran o tedaya ma keno. La nêeşkeno netîceyêke bigêro. Şarê ma hînî xo rêxistin keno, coka îmkanê ma yê serkewtişî zî zaf ê. Mi çimî de ma do narey Xarpêtî ra wekîlanê xo bişawê Meclîsî.''