Serekkomarê tirkî R.Tayyîp Erdogan 28ê êlule de do şiro Almanya. Semedê şermizarkerdişê Erdoganî çalakîyî yenî organîze kerdene. Partîya Çepî ya Almanya zî qerarê tewrbîyayîşê çalakîyan girewte.
Platformê ‘Ti xeyr nêameyî Erdogan’ (Erdogan not welcome) ke bi desan dezgeyê kurd, alman û tirkî tede ca gênê, bi rojan o semedê protestokerdişê Erdoganî amadekarî keno. Goreyê eşkerayîya platformî çalakîyê merkezî 28ê êlule saete 16.00 de Postdamerplatzê Berlînî de û 29ê êlule saete 11.00 de Deutzer Werftê Kolnî de do bêrî viraştene. Platformî waşt ke wa herkes vera Erdoganî de tewrê çalakîyan bibo û meydanan de bi vengêko berz dîktatorîye û qetilkerdişanê ci rê vajo nê.
PARTÎYA ÇEPÎ YA ALMANYA PAŞTÎ DAYE PLATFORMÎ
Partîya Çepî ya muxalefetî (Die Linke) ya Almanya daye zanayene kê aye paştî dana Platformê ‘Ti xeyr nêameyî Erdogan’. Îdarekaranê Partîya Çepî bi eşkerayîyêka qerarê xo da eşnawitene. Eşkerayî de ame vatene ke bi hezaran endamê HDPyî û 200 ra zêdîyer rojnamegerî zîndanan de yê. Dewleta almanan bi dawetkerdişê Erdoganî sey yew leteyê rejîmê ey têgerena û çîyêko wînasî nîno qebûl kerdene. Yeno pawitene ke endam û weçînayoxê Partîya Çepî tewrê çalakîyan bibî.
Per o bîn ra boykotkerdişê dîyayîşê Serokkomarê Almanya Frank Walter Steinmeier û Erdoganî yê Qesra Bellevue, beno gird. Boykot bi eşkerayîya parlamenterê Yewîya Huranê Demokratan (FDP) Bijan Djir-Sarai û Parlamentera Partiya Çep Sevîm Dagdelene dest pêkerd. Dagdelene vatbi ke herinda dawetê qesrê serekkomarî de ez tewrê çalakîya protestokerdişê Erdoganî bena. Dima ra zî parlamenteranê partîyanê bînan ra zî paştîdayîş ame û boykot bi vila. Boykotbîyayîşê Erdoganî partîyê almanan ke yewbîn ra dûrî yî, înan zî ardo têhet û nizdîyê yewbînan kerdî.
