Wekîlê HDPyî Garo Paylanî Îzmîr de kombîyayîşê şarî de qisey kerd û pare kerd ke şaristan de ruhê 7ê hezîrane est o. Paylanî venga her kesî da ke vera sîstemê faşîstî dormeyê Partîya Çep a Keske de kom bibo.
Hemvervatoxê Partîya Çep a Keske û Namzedê herêma 1. ya Îzmîrî Îbrahîm Akin û Wekîlê HDPyî Garo Paylan qezaya Karşiyaka ya Îzmîrî de tewrê kombîyayîşê şarî bîyî. Paylanî kombîyayîş de pare kerd ke Îzmîr de ruhê 7ê hezîrane est o. Girseyê şarî kombîyayîşî ra dima rixmê provakasyonê komêka nîjadpereste zî rayraşîyayîş kerd.
Paylanî dima ANFyî rê qisey kerd û vat: ''Ez pê bawer a ke Îzmîrî ra ma eşkenê tewr tay panc wekîlan bigêrê. Coka ma dostanê xo reyde heta 14ê gulane seferber bîyê.''
Paylanî ard ziwan ke weçînayîşanê 14ê gulane de vera sîstemê faşîstî ganî şar hetê Partîya Çep a Keske de kom bibo. Paylanî vat: ''Seba qedînayîşê rejîmê tekcamêrdî ma do paştî bidê Kemal Kiliçdarogluyî. Ma rayêke bidê Partîya Çep a Keske, rayêka bîne zî bidê Kemal Kiliçdarogluyî.''
