Persê 'fosforê sipîyî' Wezîra Karanê Teberî yê Swêdî ra ame kerdene

Parlamenterê Swêdî Markus Wiechelî îdîaya ke Tirkîya Rojawan de fosforo sipî xebitna sey persnameyêk daye parlamento.

Wiechelî pare kerd ke serra vîyarte de wexto ke Tirkîya cerganê xo reyde hêrişê Rojawanî kerdbi înan dîmenê sucê şerdî dîyî.

Wiechelî da zanayene ke laboratuwarêkê Swêdî de numûneyêkê şerwanêkê kurdî yê Serêkanîyê ra ame girewtene û ame eşkerakerdene ke no kes xebitnayîşê fosforê sipîyî ra birîndar bîyo.

Parlamenterî bale ante raporêkê rojnameyê El-Baharî ser. Rapor de ameyêne vatene ke wextê hêrişanê leşkeranê tirkan de fosforo sipî ame xebitnayene û zaf kesê sivîlî zî nê hêrişanê kîmyewîyan de birîndar bîyî.

Wiechelî eşkera kerd ke nê hêrişê kîmyewî yê ke warê mîyanneteweyî de qedexe yê hetê dewleta tirke û komanê ci yê cîhadîstan ra ameyî kerdene. Wicheilî vist vîrî ke seba cigêrayîşî Îdareyê Rojawanî waştişê cigêrayîşêkê mîyanneteweyî kerd.

Wiechelî Wezîra Karanê Teberî Ann Linde ra waşt ke seba cigêrayîşê hêrişanê dewleta tirke yê bi fosforê sipîyî wa Neteweyê Yewbîyayeyî tehqîqatêk bikerê û dewleta tirke seba nê sucanê xo bêra hukmkerdene.

Hêrişanê dewleta tirke yê vera Rojawanî ra dima Dr. Abbas Mansourian şibi herême û tay cigêrayîşî kerdî. Mansourian do Parlamentoya Swêdî de konferansêk bido.

Parlamenteranê Partîya Karkeran ê Demokratan a Sosyale Anders Ostberg û Kadîr Kasirgayî vat ke destê înan de raporî estê û nê raporan de yeno dîyene ke dewleta tirke hêrişanê xo yê vera Rojawanî de fosforo sîpî xebitna.

Parlamenteran eşkera kerd ke konferans 19ê sibate de saete 13:00 de parlemento de do bêro kerdene.