Serekê Pêroyî yê CHPyî Ozgur Ozel bi heyetêk DEM Partî zîyaret kerd û hemserkanê pêroyî yê partîye Tulaye Hatimogullari û Tuncer Bakirhanî reyde pêvînayîş kerd.

Bakirhanî derheqê pêvînîyayîşî de nê vatî: ''Ma sere de krizê ekonomîkî, meseleya kurdan, qeyumî û xeylêk meseleyê bînî yê welatî erjnayî. Senî ke şima zî zanî ma tim vanê, meseleyî bi dîyalog û muzakereyan yenê çareserkerdene.  Demê wina tengî de semedê partîyanê muxalefetî zafêr dîyalog û muzakere hewce keno.

Ozelî zî pêvînîyaşî ra kêfweşîya xo ard ziwan û vat, ''Dîyalogê mabênê partîyanê sîyasîyan zaf muhîm  o. Ewro ra tepîya zî dîyalog û pêvînayîşê ma do dewam bikerê.''

Tulaye Hatimogullari zî ard ziwan ke înan prosesê sîyasîyî yê dinya û Tirkîya erjnayo û  vat semedê çareserkerdişê meseleyan ganî berê dîyalogî akerde bo.