Berpirsîyarê TêkilîyanêTeberî û Hetkarê Hemserekanê HDP'yî Hişyar Ozsoy û Parlamentera Sêrtî Meral Daniş Bektaşe bi silayîya hempare ya Komîsyona Heqanê Merdiman Tom Lantos a Kongerya DYE û Yewitîya Parlamenteran a Mîyanneteweyî (IPU) ameyî û na çarçeweya de Washington de tayê pêvînayîşê dîplomatîkî kerdî. Pêvînayîşanê Heyetê HDP'yî yê DYE reyde hewteyêke dewam kerd.

Goreyê hayîdaranê ke hetê Buroyê Çapemenîye yê HDP'yî ra ameyî girewtene, endamê heyetê HDP'yî Ozsoyî û Bektaşe bi meymandarîya Tom Lantosî brîfîngêk da. Derheqê rewşa Hemserekanê Pêroyîyan ê HDP'yî Selahattîn Demîratş û Fîgen Yuksekdage û parlamenter û sîyasetmedaranê Tirkîya de tepişte yê de xeberî ameyî parekerdene. Heyetî endamanê Senato û Meclîsê Temsîlkaran, Wezaretê Karanê Teberî, Temsîlkarîya Taybete ya Sûrîye û temsîlkaranê zafê dezgehanê fikrî reyde pêvînayîşî kerd. Dezgehê Projeyê Demokrasî yê Rojkewtena Mîyanêne û Konseya Têkilîyanê Teberî reyde kombîyayîş ame kerdene û rewşa sîyasî ya Tirkîya, Sûrîye û Rojkewtena Mîyanêne ameye qiseykerdene.