16ê êlula 2022yî de cinîya kurde Jîna Emînî Tehranê Îranî de hetê polîsanê rejîmê Îranî ra amebî qetilkerdene. Serebûtî ra dima Îran û Rojhelatê Kurdîstanî de serkêşîya cinîyan de serewedaritişê 'Jin, Jiyan, Azadî' dest pêkerdbi.

Komelê Azadî û Demokratîkî yê Rojhelatê Kurdîstanî (KODAR) û Partîya Cuya Azade ya Kurdîstanî (PJAK) bi wesîleya serrgêra yewine ya serewedaritişê 'Jin, Jiyan, Azadî' eşkerayîyêka hempare daye.

Eşkerayîye de dîya zanayene ke Şorişê Jin, Jiyan, Azadî şorişêko kulturel û entelektuel ê komelanê Îran û Rojhelatê Kurdîstanî yo û waştişê azadîye yê cinîyan ra paştî gêno. Eşkerayîya hempare de ame parekerdene ke serewedaritişê Jin Jiyan, Azadî têdûştî û azadîye wazeno. 

Eşkerayîya hempare de wina ame vatene: ''Bêguman bingeyê pêro meseleyanê dewleta Îranî de meseleya azadîya kurdan û Rojhelatê Kurdîstanî est a. Tewr zaf kurdî binê zulmê rejîmê Îranî de manenê û kurdî coka serkêşîyê nê serewedaritişî kenê. Seba ke no şoriş bi temamî ser bikewo ganî şarê ma xo hîna bi zixmî rêxistin bikero. Ma seba serrgêra yewine ya Şorişê Jin, Jiyan, Azadî partîyanê bînan ê Rojhelatê Kurdîstanî reyde kampanyayêke daye destpêkerdene.

-Ma venga pêro şarê xo yê Rojhelatê Kurdîstanî û şarê Îranî danê ke 16ê êlule de tewrê grevê pêroyîyî bibê, dikananê xo biqefilnê.

-16ê êlule de serê goranê şehîdan de bêrê pêser û vejîyê meydanan. Wa roşnvîr, cinî, ciwan, temsîlkarê partî û dezgehan û şarê ma 16ê êlule de her warî de amade bibê.

Şorişê Jin, Jiyan, Azadî şorişêko kulturel û entelektuel ê komelanê Îran û Rojhelatê Kurdîstanî yo. Erkê her kesî yo ke vera dîktatorî û rejîmê Îranî vejîyo û têkoşîn bikero.''