Komîteya Rayberdişî ya PKKyî bi wesîleya 1ê Gulane eşkerayîyêke daye.

Eşkerayîye wina ya:

''Ma sey şarê kurdî yê welatpperwer û kedkarî dekewenê 1ê Gulane. 1ê Gulane yê pêro karker û kedkaran fîraz bo. Şayîyanê 8ê Adare û Newroze mojna ke emser 1ê Gulane do pê coşî fîraz bibo û xoverdayîşê şarî yê vera AKP-MHPyî bireso astêka berze. Eşkera yo ke her war de qîrayîşê seba azadîye, demokrasî û sosyalîzmî berz bibo. Nika ra aseno ke war û kuçeyî pê kedkar û karkeran pirr bibê û ê do goş bêdê astengî û qedexeyêkî. Şarê ma do 1ê Gulane de Hemleya 'Wextê Azadîye' berz bikero û azadîya Rayber Apoyî biwazo.

Nê esasî ser o ma 1ê Gulane yê Rayber Apoyî, embazan, şarê ma, karker û kedkaran, hêzanê şorişgêr û sosyalîstan fîraz bikerê; her kesî rê serkewtiş wazenê. Ma şexsê embaz Sînan Dêrsimî de pêro şehîdan bi rêzdarî yad kenê; sozê xo dibare kenê ke ma do wayîrê mîrasê înan vejîyê û armancanê înan ser bivisnê. Ma pê bawer ê ke 1ê Gulane do prosesê rijîyayîşê faşîzmê AKP-MHPyî lezêr bikerê. Ma venga her kesî danê ke waranê 1ê Gulane pirr bikero, vera hêrişanê îşxalî yê dîktatorîya AKP-MHPyî têkoşîn xurtêr bikerê.

Têgêrayîşê azadîye yê Kurdîstanî, şarê kurdî, hêzê karker û kedkeran ê dinya prosesêkê winasênî de 1ê Gulane pêşwazî kenê. Dewleta tirke ya îşxalkere 23ê nîsane de hêrişê waranê Zap, Metîna û avaşînî yê Herêmanê Pawitişî yê Medya kerd. Artêşa tirke ya îşxalkere û cerganê şerê taybetî yê gemarinan Qilaban, Çelê, Gever û Şemzînanî ra sînor derbaz kerd û çar baskan ra hêrişê herêmanê gerîlayanê HPG û YJA-Starî kerd.

Nê hêrişan de teyarayê şerî û helîkopterê keşf û şerî, hêzê hewayî û yewinanê erdî, cergê ke DAÎŞ û El Qaîdeyî ra mendî şuxilîyenê. Pê bombardumanan xîret yeno kerdene ke herême bêra îşxalkerdene. Dewê herême, kampê sivîlî pê zorî yenê vengkerdene. Îşxalê AKP-MHPyî pê Rojawanî dest pêkerd û pê Xakûrkê û Heftanîn dewam kerd. Nika zî nê xîret kenê Metîna, Zap û Avaşînî îşxal bikerê. Gerîlayê HPG û YJA-Starî pê çêrî vera hêrişanê îşxalî xo ver danê û dezgehê çapemenîye tim pare kenê ke derbê giranî dîyenê hêzanê îşxalkeran ro.  Qerargehê ma yê gerîlayan heer roj bîlanço eşkera kenê. Aseno ke îşxalê înan do rehet nêbo, hêzê dewlete kewtê dafika gerîlayan, cografyaya Zagrosî do biba goristanê faşîzmê AKP-MHPyî û gerîlayî do serkewtişê Garê Zagrosan de temam bikerê. Nê esasî ser o ma xoverdayîşê gerîlayanê HPG û YJA-Starî selam kenê û Hemleya Şorişgêre ya Bazanê Zagrosî û Hemleya Şorişgêre ya Cengê Xabûrî rê serkewtiş wazenê.

Balkêş o nê hêrişan pêvînayîşê Îdareyê neweyî yê Amerîka û Erdoganî ra dima dest pêkerd. Hêrişê vera Zapî yê 2008î de zî wina bibi. 5ê nîsana 2007î de Amerîka û Erdoganî pêvînayîşî kerdbi, 1ê kanûna 2007î ra dima Amerîka agahîyî dabi dewleta tirke û sibata 2008î de hêrişî kewtbî rojdem. Nê çîyî tesadûfî nîyê. 

AKP-MHP Amerîka, Ewropa û Rûsya ra destek gênê û hêrişê kurdan kenê. Coka Amerîka û Iraqî warê hewayî Tirkîya rê akerd. Sere de PDK hêzê kurdan vera îşxalî tênêgêrenê eqsê ci paştî danê hêrişan. Ganî na raştîye bêra dîyene. Êyê ke nika destek danê qirkerdişê kurdan vateyê înan ê seba şermezarkerdişê qirkerdişê Armenîyan rê nêno bawerkerdene. Eke nê hêzî xo raşt nêkerê nê polîtîkayê înan hetê tarîxî ra do bêrê muhakemekerdene.

Ma sey Têgêrayîşê Azadîye yê Kurdîstanî û şarê kurdî heta nika vera hêrişanê îşxalî xo ver da û ma do xo ver bidê. Kamyew parçe beno wa bibo ma do seba azadîya Kurdîstanî û kurdan heta peynî têkoşîn bikerê. Ma do bedelê ci zî bidê. Gerîlayî û kurdî her roje îşxalkeran rê Kurdîstan kenê zîndan. Hîşmendî û sîyaseto faşîst-qirker do koyan û şaristananê Kurdîstanî de bêrê definkerdene. Ma têna waşt ke nê têkoşînê fîrazî de pêro hêzê sîyasî yê kurdan ma hetî de bibê! Ma têna waşt ke kam beno wa biboqet yew kes pê sûcê qirkerdişî xo lêşin nêkero!

Şarê ma yo welatperwer ganî hol bizano ke rewşêka winasêne de ke ma 1ê Gulane pêşwazî kenê, dişmeno faşîst xîret keno ke îmha û îşxalî ma rê ferz keno. Rewşe cidî û giran a. Roje roja têkoşînî ya, roje a roj a ke dişmeno faşîst-qirker Zap û Zagros de bêro fatisnayene. Kes şik nêkero ke gerîlayê ma destê înan ra çita yeno do bikerê. La mesuldarîye kewena pêro şarê ma yê çar parçeyanê Kurdîstanî û teberê welatî, cinî û ciwananê ma. Coka rolê şarê ma yê Başûrê Kurdîstanî tarîxî yo. Coka ganî şarê ma yo welatperwer wayîrê nê wezîfeyê tarîxî vejîyê û kamca de beno wa bibo veraa dîktatorîya faşîst-qirkere ya AKP-MHPyî têkoşîn xurtêr bikero. Ganî şarê ma xîret bikero ke şarê Tirkîya û Rojhelatê Mîyanênî û pêro merdimîye tewrê nê têkoşînê fîrazî bibê.

Eşkera yo nê çîyê ke şarê ma û têgêrayîşê ma ciwîyenê, 1ê Gulane manadar kenê, benê wesîla ke ma krîteranê yewîye, paştdayîş û têkoşînî yê 1ê Gulane zêdêr biciwîyê. O çax ma dormeyê nê krîteranê 1ê Gulane de bibê yewca, paştdayîş bidê yewbînan û pê têkoşînêkê pîlî faşîzmê AKP-MHPyî Zagros de bikerê binê erdî. Ma şorişê azadîya cinîyan geş bikerê, her tewirê kanwazîya camêrdîye birijnê û wina cuya azade û komelê demokratîkî geş bikerê. Ma şorişê ekolojîkî geş bikerê, sîstemê modernîteya kapîtalîste û vîrusê Korona bierzê çopê tarîxî.

Na çarçewe de ma reyna 1ê Gulane yê şarê xo yê welatperwerî û hêzanê kedkaran fîraz kenê. Ma venga her kesî danê ke waranê 1ê Gulane pirr bikero, vera hêrişanê îşxalî yê dîktatorîya AKP-MHPyî têkoşîn xurtêr bikero!''