Walîtîya Dêrsimî bi bahaneya 'tedeyîya ci mehqûl nîya' konserê 12ê tebaxe qedexe kerdbî. Platformê Dêrsim Hayî derheqê babete de kombîyayîşê çapemenîye kerd.

Vervatoxê Platformî Ahmet Balkisî kombîyayîş de qisey kerd û pare kerd ke qedexeyê walîtîye vera azadîya fikran û heqanê merdiman hêriş o.  

Balkisî vat: ''Astengkerdişê aktîvîteyanê kulturelan ganî sey hêrişê vera erjanê demokratîkan bêro qebulkerdene. Nê qedexeyî vera demokrasî û azadîye tehlukeyê cidî yê. Ma venga pêro pawitoxanê demokrasî danê ke seba ke huner û kultur tede azad bibê komelêkî awan bikerê û têkoşîn bikerê. Nê prosesê zehmetî de erkê ma yo ke ma wayîrê krîteranê demokrasî û azadîyanê xo vejîyê. Nê qedexeyê vera kultur û hunerî qetî nênê qebulkerdene.''