Platformê Kede û Demokrasî yê Amedî derheqê grevê vêşanîye yê seba wedaritişê tecrîdê serê Rayberê Şarê Kurdî Abdullah Ocalanî Beşê Hûmara 1’in ê Egîtîm-Senî de eşkerayîya çapemenîye daye.

Hemvervatoxê  Platformî Mehmet Şîrîn Gurbuzî eşkerayîye de da zanaye ke hukmat ganî êdî nê qîrayîşî biheşno, bi çarçewaya asayîşî nêzdîyê nê serebutî bibo.

Zext girewteyan rê yeno kerdene

Gurbuzî vat ke, “Goreyê xebere ke kewtê ma dest, xebatê grubanê xoserîyan ê weşîye yenê astengkerdene. Wareyê resayîşê wîtamînanê B1 û B12’î de astengîyê girdî estê. Rayberîyê hepisxaneyan û gardîyanî zextan bi girewteyan kenê. Hepisxaneyan û teber de rewşa xoverdayoxan krîtîk a û grevê vêşanîye yê hepisxaneyan bedilîya rojeyê mergî. Eynî wext de dayîkê ke domanê înan grevê vêşanîye de yê, her roje hêriş bi înan yeno kerdene. Ma vengdayîş bi selahîyetdaran kenê ke ganî tecrîd bêro wedaritene. Ganî selahîyetdarî goreyê huqûqî kesan ney, ganî goreyê peymeyê huqûqî têgêrayîş bikerê.”