Prof. Trabertî Meclîsê Federalî yê Almanî de behsa muşahedeyanê xo yê Rojawanî kerde û vat, "Rojawan herêmêka demokratîk o ke xo baş bi rêxistine kerd. Labelê rîyê ambargoyî ra meseleyê giranî yê weşîye estê. Ganî ma înan têna meverdê."
Serekê Rêxistina Xizmetê Weşîye û Muxalefetê Feqirîye (Armut und Gesundheit e.V.) Prof. Gerhad Trabert çend rojî cuwa ver şîbi Rojawanê Kurdistanî. Prof. Traberto ke heta nika zaf reyan şi herême û seba tedarikkerdişê ganîyîye yê weşîye Rojawan de rayberîya xeylî kampanyayan kerde, Meclîsê Federalî de behsa muşahedeyanê xo kerde.
'Hûmara Cinîyanê ke Gede Ver Şinê Dilab Zêdêr Bîye'
Prof. Trabertî vat: ‘‘Dimayê tehdîtanê dewleta Tirkî hûmara cinîyanê ke gede ver şinê bi di qatî zêdêr bîyî. Ma vajê, her cayê herême de meseleyê doktorî, psîkîyatrî, malzemeyê tibî û dermanan estî. Ver tehdîtanê hêrişî yê dewleta Tirkî nêeşkenî bi temamî xizmetê weşîye bikê. Semedê kêmasîyanê mudaxeleyî yê tibî ra destpêkê şerî ra nata mîyanê 200 hezar û 300 hezar merdiman wefat kerd. Ganî hukmatê Almanî yo Federalî hetkarîya bi herêma Rojawanî rê bike. Têna vakurê Iraqî ra merdim eşkeno xo birese herême. Bitaybetî tedarikkerdişê malzemeyî yê weşîye de meseleyê cidîyî estê. Hetkarîya ke yena erşawitene ya yena astengkerdene yan zî erey destûr ci rê yena dayene."
Prof. Trabertî veng da hukmatê Almanî û welatanê Yewîya Ewropa zî û vat, "Bi tedaya sîyasî ya verba Tirkîya ya ke NATO de partnera şima ya, meverde ke hêrişê Rojawanî bike. Ganî tehdîtê ke herême de benî sedemê ters û qesawetî, bêrê caverdene."
