Goreyê xebera Ajansê Mezopotamya vizêr şan leşkeranê artêşa tirke eşt dewa Çamilî ya qezaya Qelqelî ya Wanî ser. Leşkeran banêk pê çekanê giranan da guleyan ver ke tede 2 kesî est bîyê. Goreyê agahîyanê ke roniştoxan dayo, leşkeran dormeyê dewe girewt, saete 14.00 de dest pê operasyonî kerdo û 16.30 de operasyon qedînayo.

Ame parekerdene ke banê metrukî de 2 kesan dinyaya xo bedilnaya. Cenazayê wird kesan pê makîneyanê karî binê enqazî ra ameyî vetene. Nêzanîyenê ke nê wird kesî kam bîyê û cenazayê înan ameyê berdene bi kamca.

Leşkeran wextê ablûqa de nêverda ke çew nêzdîyê taxa banê metrukî bibo. Dîya zanayene ke leşkeran kişta banê metrukî de eşto banêkê bînî ser û Omer Kiliççeken û lajê ci Samî Kiliççeken destbend kerdê. Babî û laj ameyî berdene bi Qereqolê Cendirmeyan ê Qelqelî.

Serebûtî ser o Wekîlê Partîya Çep a Keske Gulcane Kaçmaz Sayyîgît, Sînan Çîftyurek, Mahmut Dîndar û Zulkuf Uçar, îdarekarê Rêxistina HDPyî, avûkatê Baroyê Wanî û OHDyî û îdarekarê ÎHDyî sey heyetêkî ver bi dewe kewtî rayîr. La leşkeran nêverda ke heyet debikewo taxe.

Heyet astengkerdişê leşkeran ser o agêra.