Vizêr xeylêk bajaranê Kurdîstanî û Tirkîya de çalakîyanê protestoyî yê vera qetilkerdişê Narîne Guran dewam kerd.

Îstanbul de  rêxsitinanê ciwanan bi şîare ''Sîstemo ke Narînan nêdano ciwîyayene ma do tira hesab biperse'' Kadikoy de rayraşîyayîş organîze kerd. Polîsan kerd ke verê çalakwanan bîgêro. Şarî zî bi çapikan paştî daye ciwanan. Çalakîye de sloganê sey ''Sebi Narîne?'',  ''Înanê ke aya vînî kerde do vînî bikerê'', ''Kiştoxê Narîne kerdoxê Gulîstane'' ameyî vatene. Ciwanî rixmê vergirewtişê polîsan resayî Meydanê Iskele yê Kadikoyî û tîya eşkerayîye daye.

Eşkerayîye de ame vatene ke ê do kiştoxan û hemkaranê înan ra hesab bipersê û seba ke Narîne bînî nêrê qetilkerdene ê do vera sîstemê camêrdê serdestî yê helisîyayeyî têkoşîn bikerê. Badê eşkerayîye polîsan hêrişê ciwanan kerd û şeş kesî bi derbkerdişî destbend kerdî.

Reyna Amed,Bêdlis, Sêrt,Tetwan, Hatay, Adana û xeylêk bajaranê bînna de qetilkerdişê Narîne ame protestokerdene.