Sekretera Pêroyî ya Platfromê Ma Do Verê Kişîyayîşê Cinîyan Bigêrê (KCDP) Fîdane Ataselîm derheqê qetilkerdişê Narîne Guran de ANFyî rê qisey kerd.

Fîdane ard ziwan ke ganî qetilkerdişê Narîne her hetî ra bêro cigêrayene û detayî rayaumûmîye de bêrê parekerdene. Fîdane vat: ''Dewa bi 20 xaneyan de no serebût qewimîyayo. Polîtîkayê îqtîdarî yê serê keyeyan zaf bitehluke yê. Îqtîdar vano ke wa keyeyî vila nêbê. La nê keyeyan de cinî û domanî yenê qetilkerdene. Îqtîdar keno ke wa saltanatê camêrdan mîyanê keyeyan de dewam bikero. Nê polîtîkayan ra gonîya Narîne destê îqtîdarî de ya. Qetilkerdişê Narîne ra îqtîdar mesuldar o.''

Fîdane îfade kerd ke ganî komel vera serebûtanê winayênan vindero û vat: ''Beno ke tay kesî xîret bikerê ke vengê cinîyan bibirnê. Talîban çendek vengê cinîyan birneno zî vengê cinîyan reseno asmênî ser. Ma do qetî destûr nêdê ke no ca zî o qayde bibo. Ganî ma têkoşînêkê hemparî bikerê. Ganî ma vera nê kerdişan teyna medyaya dîjîtale de tewirê xo nêmojnê. Ganî ma xo rêxistin bikerê.''