Kemal Pîro ke kadroyanê PKKyî yê verênan ra bîyo, Zîndanê Amedî de, 7ê êlula 1982yî de roja 56. ya rojeyê mergî de şehîd bibi. 

Serrgêra 41. ya şehadetê Kemal Pîrî de birazîyê Pîrî û Wekîlê HDPyî yê verênî Zîya Pîrî ANFyî rê qala apê xo kerde.

Kemal Pîr 1952 de dewa Guzelolukî ya qezaya Torulî ya Gumuşhane de dadîya xo ra beno. Babîyê ey karker bi. Kemal Pîr dibistana verêne dewe de, dibistana mîyanêne û lîse zî Ordu de waneno.

Zîya Pîrî da zanayene ke Kemal Pîrî Ordu de Hakî Karer şinasnayo û vat: ''Lîseya Orduyî de Kemal Pîr û Hakî Karer fikrê sosyalîzmî û şorişî ser o nîqaşî kenê û xo aver benê. Her kes vano ke Kemal Pîr dewa ma de hema ciwanîya xo de vera neheqîye tim têgêrayêne coka her kesî ey rê hûrmet kerdêne. Wexto ke o ameyêne dewe tim odaya xo de kitabî wendêne. Ey hetê xo de zî kitabî û rojnameyî ardêne, dayêne dewijan ke wa biwanê.

Apê mi wexto ke Anqara de wendêne beno şorişgêr. Babîyê mi rayêke şino zîyaretê ey û wazeno ke ey zî bero Almanya. La apê mi qebul nêkeno û vano ke o do Tirkîya de têkoşînê heqî bikero. O çax ez 7 serre bîya. Her roje leşkeran eştêne dewa ma ser û keyeyê ma gêrayêne. Dewe de her kesî seba Kemal Pîrî vatêne 'O bîyo anarşîst.' Kemal Pîr rojêke reya peyêne ame dewe û serê sibayî rew ver bi rayîrê koyî şi. Babîyê mi tedayan ra 1979 de Almanya de cabi û dima ma zî berdî. O çax televîzyonan de qala 'Apogîran' ameyêne kerdene. Mi fam kerd ke apê mi Kemal Pîr zî nînan ra yew o. Almanya de Radyoyê Kolnî est bi. Nê radyoyî zî tim qala Apogîran kerdêne. Nameyê Kemal Pîrî û embazanê ey vatêne. Mi o çax kurdî zî şinasnayî.

Kemal Pîr hetêkî ra kesêko polîtîk bi û hetêkî ra bîn zî apê mi bi. Ey hetê polîtîkî ra bira raştikêne daye. Ey vato 'Seba şîyarbîyayîşê kurdan ganî ez bimira.' Na cumleya ey seba mi zî yew nimûne ya. 

Zaf erey hayîya ma pê bîya ke o Zîndanê Amedî de yo. Zimistanê 1981î de pîrikê mi û amika mi şîyê zîyaretê ey. Amika mi vatêne o pêvînayîşêko zaf zehmet bîyo. 1982 de ma sey keyeyî Almanya ra şi dewe. Babîyê mi şino zîyaretê Kemal Pîrî la destûr nêdîyeno ey. Di mengan ra dima zî ma xebera şehadetê ey girewte. Çewî seba cenaza wesayît nêdayo pîrikê mi. Pîrikê mi şino Amed, avûkatêk vîneno. Avûkat babîyê mi rê vano ke Kemal Pîrî îşkence dîyo. Dima pîrikê mi cenaza ano. Amika mi û pîrika mi yew rêça ey ra Kemal Pîrî şinasnenê. Ey hende îşkence dîyo û 56 rojan rojeyê mergî kerdo.

Almanya de embazê Kemal Pîrî 1982 de ameyî keyeyê ma. Mergê ey ra dima ma kesayetê ey o polîtîk şinasna. Ma zanit ke ey têkoşînêko pîl kerdo û ganê xo dayo. Ez sey birazîyê ey kena ke rêçê ey de şora. Mi zî 14 serrîya xo de têkoşînê kurdan şinasna û xo nêzdîyê ci kerd.

Kemal Pîrî dima ke 1972 de Abdullah Ocalan şinasnayo têkoşînê Kurdîstanî de cagirewto. Ey kurdî o çax şinasnayî û neheqîyanê vera kurdan zaf tesîrê ci kerdo.''