Serkêşîya ederasyonê Komeleyanê Dêrsimî (DEDEF), Federasyonê Yewîya Dêrsimî ya Demokratîke ya Ewropa (ADEF) û Merkezê Cigêrayîşanê Dêrsimî (DAM) de Îskeleya Kadikoyî ya Îstanbulî de serrgêra 86. ya Terteleyê Dêrsimî de çalakîyêka protestoyî ameye kerdene.

Çalakîye de pankarta 'Roza Şîyaye' ameye akerdene û fotografê Seyîd Rizayî ameyî kiriştene.

Hemvervatoxa Partîya Çep a Keske Çîgdeme Kiliçgun Uçar, Turgut Oker, Cengîz Çîçek, Hasan Cemal, Cemîl Gungoren û xeylêk temsîlkarê partî û dezgehan tewrê çalakîye bîyî.

Çalakîye bi rêzgirewtişî dest pêkerd. Dima Îdareyê DEDEFî ra Sebahate Babayîgît qisey kerd û pare kerd ke dewleta tirke ganî seba Terteleyê Dêrsimî uzrêkê resmîyî bikero. Babayîgîye vat: ''Ma çîyêk zî xo vîr a nêkerd û efû nêkerd. Wa arşîvî bêrê akerdene û nameyê Dêrsimî îade bibo. Wa şarê Dêrsimî ra bi hawayêkê resmîyî uzr bêro waştene. Wa cayê goran bêrê eşkerakerdene, elewîtîye bêra şinasnayene û projeyê talanî yê vera Dêrsimî bêrê betalkerdene.''

Dima Çîgdeme Kiliçgun Uçar qisey kerd û vat: ''Heta ke seba Terteleyê Dêrsimî edalet bêro caardene têkoşînê ma do dewam bikero. Elewîyan pê têkoşînê xo qirkerdiş pûç kerdo. Têkoşînê elewîyan têkoşînê ma yo.''

Dima çalakîya roniştişî ameye kerdene. Hunermendan tîya de qirkerdişî ser o lorîkî vatî û dima qeranfîlî nayî ro.

Anqara

DADî zî Cemxaneyê Ana Fatma ya Anqara de qurbanê Terteleyê Dêrsimî yad kerdî. Hemserekê DADÎ yê Anqara Mustafa Karabudakî derheqê terteleyî de qisey kerd û vat: ''Elewîyî ganî têkoşînê xo berz bikerê. Xoverdayîş ma rê mîras o!'' Pîr û nuştox Seyfettîn Elaldiyî zî bername de şiîr xo 'Destanê Dêrsimî' wende.