Qezaya Artemêtî ya Wanî de 9ê gulana 2022yî de Makbule Ozer (81)  bi îdîaya ''hetkarîya rêxistine'' bi cezaya 2 serran û 1 menge ameye tepitetene. Cezaya Ozere  serrêke ameye peydeeştene û 7ê êlula 2022yî de ameye serbest veradayene. Dezgehê Tibê Edlîyî (ATK) raporê eşkena zîndan de bimano da.  Naye sero Makbule Ozer newera kewna zîndan.

Serdozgerîya Komare ya Wanî seba ke cezaya ke serrêke peyde eşta yewna serre peyde bierzo newera raporê ATKyî waşt. ATKyî narey raporê ''Eşkena zîndan de biman'' da Makbule Ozer. Naye sero rayîrê zîndanî ame akerdene.

Bado ke raporê verênî serî ra serrêke ravîyarte ATKyî qey wina yew rapor da. Raporê 5ê êlula 2022yî yê ATKyî de wina amebi vatene ''Eke tedawî mebo, rîskê şikyayîşê esteyî est o,  seba ke serê ci zî şîyî dîyar, rîsk est o.'' Rapor de reyna qala astimî zî ameybî kerdene. Eynî raporî de amebi vatene ke Makbule Ozer têna nêeşkena miqatê xo bibo coka qerarê nêeşkena zîndan de bimano amebi girewtene. ATKyî badê serrêke rapor bedilna.

Raporê Dezgehê Tibê Edlîyî yê 1ê teşrîna peyêne ya 2023yî de yeno vatene ke wird linganê Makbule Ozer de problemî est ê, coka nêeşkena linganê xo ser pay vindero, wird goşê ci zî bîyî giran, nêweşîya astîmî tede est a.  Rixmo ke goreyê raporê verênî çîyo cîya tede çîn o zî ame vatene ke a eşkena zîndanê tîpê Ryî de bimano û badê 3 aşman do newera raporê weşîye bêro girewtene.

Hetê bînî ra wekîlanê HEDEPî semedê Makbule Ozer muracatê Komîsyonê Cipersayîşî yê Heqanê Merdiman ê Meclîsî kerd. Wekîlan vat Makbule Ozera ke nêweş û extîyar a nêeşkena zîndan de bimano û waşt wa huqûq bêro caardene.