27ê nîsane (ewro) de teberê welatî de raydayîş dest pêkerd û raydayîş heta 9ê gulane dewam bikero. 

Goreyê Heyetê Weçînayîşan ê Berzî (YSK) seba raydayîşê teberê welatî gumrukan de 4 hezar û 671 sindoqî ameyî ronayene. Teberê welatî de 3 mîlyon û 416 hezar û 98 weçînitoxî do raye bidê. Teberê welatî de weçînitoxî zere û peyê hewteyî de mabênê 09.00-21.00 de, sersefîrîyan de zî mabênê saete 09.00-18.00 de eşkenê raye bidê.

Goreyê doneyanê YSKyî weçînitoxî tewr zaf Almanya de yê.

Ewro paytextê Almanya Berlin de serê sibayî weçînitoxan dest pê raydayîşî kerd. Goreyê agahîyanê ke Koordînasyonê Berlinî yê Îtîfaqê Kede û Azadîye dayê, weçînitoxî Wedding, Kreuzberg û Neukollnî ra eşkenê pê otobusan şorê raya xo bidê. 

Dresden û Halle de zî Merkezanê Komelê Demokratîkî ra otobusî do wurzê we.

Chemnitz de do wesayîtî wurzê we.

Magdeburg û Leipzig de otobusî do weçînitoxan berê cayê raydayîşî.

Seba asayîşê sindoqan Berlin de nameyê Partîya Çep a Keske ser o 220 muşahîdî do wezîfedar bibê.