'Rayraşîyayîşê Îradeyî rê Hurmet'î yo ke DEM Partî vera destsernayîşê Şaredarîya Colemêrgî da desptêkerdene, bi eşkerayîya çapemenîye qedîya.

Bi seyan kesê ke verê Walîtîya Hakkarî de ameyî pêser tîya eşkerayîye daye. Hemsereka DEM Partî ya Colemêrgî Humeyra Armuta ke şarî rê spas kerd vat vera xespkerdişê îradeyî do çalakîyî dewam bikerê.

Hemsereka Pêroyî ya DEM Partî Tulaye Hatimogullari vat: ''No heyetê ma new rojî yo rayîr de yo.  Îstanbulî ra, Tekirdag, Izmir, Anqara û Çukurova ra, Tirkîya û Kurdîstanî ra însanan verê xo da Colemêrgî. No rayraşîyayîş bi waştişê semedê îradeyî rê hurmetî ame kerdene. Bîlasebeb cezaya 19 serran dîyaye embazê Mehmed Siddikî.

Bajarekê Kula yê Manîsa de serekê şaredarîye tepişya û herinda ci de meclîsê şaredarî serekê xo vîjna. Ma Colmêrg de se kerd?  Meclîsê ma yê şaredarîye ame pêser û hemşaredara ma Vîyane Tekçe sey serekwekîle vîjnaye. Nika ganî embaza ma Vîyane Tekçe sey hemşaredare fermî bêro naskerdene, la nêkenê.

Pîya bi eciqnayîşê îradeyê şarê Colemêrgî qanûnê bingeyî zî yeno eciqnayene. Coka ma tîya ra reyna veng danê ke wa qanûnê bingeyî bêro caardene.  Pêkerdişê ke morê Tirkîya zî binê ci de yo wa bêrê caardene. Wa goreyê protokolê Venedîkî bêro têgêrayene.  Nê qeyûmê ke ewro yenê tayînkerdene tênê goreyê qanûnanê Tirkîya sûc nîyê, cayê înan pêkerdişanê Ewropa de zî çîn o.

Ma tîya reyna veng danê. Ma wayîrê îradeyê xo vejîyenê. Qeyûmî cade peyser biancê, wa Vîyane Tekçe wa sey serekwekîle bêra  tayînkerdene. Ma do sey hêzanê demokrasî yê Tirkîya wayîrê îradeyê xo bivejîyê. Her hetê Tirkîya ra vera qeyûmî veng bi berz. Çunke no têna problemê kurdan nîyo.  No têna problemê Colemêrgî, problemê DEM Partî nîyo. No problemê pêro Tirkîya yo, heme şaredarîyî binê tehluke de yê. Çalakîya ma ewro tîya qedîyena la têkoşînê ma do dewam bikero.''