Çar parçeyanê Kurdîstanî û Tirkîya ra hemwelatîyî seba azadîya Rayberê Şarê Kurdî Abdullah Ocalanî û vera tecrîdê Îmraliyî rixmê pêro astengîyan zî ver bi Gemlîkî şinê. Ewro zî xeylêk şaristananê Marmara û Ege ra bi hezaran kesî do ver bi Gemlîkî şorê.

Vizêr çalakîkerî Wan, Êlih, Sêrt, Şirnex, Mêrdîn, Riha, Edene, Dîlok, Hatay, Mêrdîn û Osmaniye ra kewtî rayîr û rixmê astengîyan zî ver bi Gemlîkî rayîr a şîyî. 

Vizêr kesê ke seba Rayraşîyayîşê Azadîye bi otobus û wesayîtanê şexsîyan Êlih, Sêrt, Şirnex, Mêrdîn û Riha ra kewtî rayîrî nêmroje resayî Amedî. Tîya de girseyî govende girewte û ver bi Parka Koşuyoluyî bi slogananê sey "Bijî Serok Apo", "Bijî berxwedana Îmraliyê" rayraşîyayîş kerd. Polîsan waşt ke rayraşîyayîşî asteng bikerê. 

Verê bînaya DBPyî ya Amedî de Hemserekê DBPyî Keskîn Bayindirî bale ante astengîyanê polîsan ser û vat: ''No rayîr rayîrê azadîye yo ke tede ma do qetî ser bikewê.''

Hemwelatîyê ke Adana, Hatay, Osmanîye û Dîlokî ra kewtbî rayîr zî rixmê pêro astengîyan zî resayî Mersîn. 

Wan de hemwelatîyî Kuçeyê Hunerî yê qezaya Rêya Armûşî de kom bîyî. Polîsan eşkerayîye girseyî asteng kerde û hêrişê girseyî kerd. Rixmê hêriş û destbendkerdişan zî girseyî vera sloganê ''Bijî berxwedana Îmraliyê" berz kerd.

Kuçeyanê Wanî de wextêko derg sloganê ''Bê Serok jiyan nabe'' ame vatene.