Tepişteyo nêweş Îsmaîl Tanboga 2015 de Şirnex de amebi tepiştene û cezaya muebede dîyabî ci. Tanboga zîndan de bi giranî nêweş kewt. Goreyê tay testan ci de kanser, guatr û ulser est ê la nêweşîya ci bi hawayêkê zelalî nêameye teşhîskerdene.

Dima ke rewşa ci bîya giranêr Tanboga Zîndanê Amedî ra sewqê Nêweşxaneyê Zanîngehê Dîcle ame kerdene. Rewşa tepişteyê nêweşî Îsmaîl Tanbogayî giran a ke 29 rojî yo Amed de nêweşxane de yeno tedawîkerdene.

Babîyê Tanbogayî Abdullah Tanbogayî 26ê teşrîna peyêne de doktorê lajê xo de qisey kerd. Babî Tanbogayî îfade kerd ke lajê ci de kîtleyê kanserî, meseleya rayîranê îdrarî û tengîyê damaran est ê. Babîyî vat: ''Lajê mi bîyo 35 kîloyan. Doktorî hema zî nêeşkenê nêweşîya ey tesbît bikerê. Doktoran lajê mi sewqê nêweşxaneyanê Anqara yan zî Îstanbulî kerd û vat ke wa nêerşawîyo zîndanî. Ma wazenê ke wa lajê mi vera bidîyo û tedawîya ci bêra kerdene.''