Kampanyaya ke semedê azadîya Rayberê Şarê Kurdî Abdullah Ocalanî yena rayraberdene çend şino vila bena. Her roje rêxistinê neweyî tewrê kampanya benê. Rêxistina Yewîya Projeyanê Komelkîyan ê Afernayoxan (ACCP) ya Gana zî  eşkera kerd a tewrê kampanyaya 'Ocalanî rê azadîye' bîye.

ACCPyo ke 2008 de ame ronayene 2013î ra nata wayîrê statuya Konseya Ekonomîk û Komelî ya Neteweyê Yewbîyayeyî (NY) yo.

Serekê ACCPyî John Nana Yaw Okyereyî bi nameyê rêxistina xo çarçewa kampanyaya ''Wextê ci yo: Abdullah Ocalanî rê azadîye'' de Sekreterê Pêroyî yê Neteweyanê Yewbîyayeyan Antonio Guterresî rê mektup nuşt û nê vatî:

''Rayberê Partîya Karkeran a Kurdîstanî Abdullah Ocalan 20 serran ra zafêr o ke binê tecrîdî de yo. Abdullah Ocalan hetê bi mîlyonan kurdan ra sey temsîlkarê fermî û rayberê têkoşînê vera zextê dewleta tirke yeno qebulkerdene. Abdullah Ocalanî mabênê serranê 2013-2015î dewleta tirke reyde pêvînayîşî kerdî û semedê çareserî û haştîye  rolo merkezî kay kerd. Bêşik o ke Ocalan muxatabê haştîya bianore û bitesîre yo. Azadîya Rayberê Şarê Kurdî Abdullah Ocalanî semedê çareserîya meseleya kurdî zaf muhîm a. Ma şima ra rîca kenê wa semedê wedaritişê  tecrîdî komîteya vera îşkenceyî OHCHR bikewo dewre. Reyna ma rîca kenê ke sey serkterê pêroyî yê NYyî semedê serbestverdayîşê Abdullah Ocalanî heme selahîyetê xo bişuxulnê. Na nuqtaya krîtîke de ma veng danê ke wa Heyetê Pêroyî yê NYyî semedê pêvînayîşanê haştîye têbigero û Tirkîya huqûqê mîyanneteweyî bîyaro ca.''