Endama Konseya leşkeri ya YJA Starî Rojda Amede bi wesîleya şehîdanê menga Gulane ANF’yî rê qisey kerd.

Rojda Amede da zanayene ke şehîdê menga Gulane rayîrê azadîye de vernîya her şorişgêrî roşin kenê û vat, “Menga Gulane seba ma wayîrê manayêka xeylî pîle ya. Serkêşê ma yê qeehremanî na menge de resayî dereceya şehadetî. Şexsê kadroyanê serkêşan ê têgêrayîşê ma Hakî Karer, Halîl Çavgûn, Mehmet Karasûngûr, Mizgîne de, ez embaz Zulkuf, embaze Medya, Zehra û heme şehîdanê menga Gulane bi hurmet bi vîr ana. Heman wextî de ez şexsê hemra Îbrahîm Kaypakkaya û Denîz Gezmîşî de heme şehîdanê şorişî bi minet bi vîr ana.”

‘Zîndan Hewna zî Wareyêkê Estbîyayîşî yo’

Rojda Amede bale ante serê cayê muhîmî yê tarîxê zîndanan ê mîyanê têgêrayîşê azadîya Kurdan ser û vat, “Dişmen roja ewilêne ra heta nê wextî waşt kadroyanê serkêşan ê têgêrayîşê ma zîndanan de bifetesno, çinê bikero. Şexsê înan de waşt ke PKK’yî tasfîye bikero. Bi heman hawayî şexsê înan de waşt ke vînayîş û fikranê Rayber Apoyî tasfîye bikero û seba naye zî her rayîr û metodê îşkenceyî bica ardî.

Barbarîya tewr pîle zîndanan de kerde. Labelê Çaran bi serkêşîya hemra Ferhat Kûrtayî hemverê hêrişan de bi bedenê xo çalakî viraşte û ramot ke vînayîş û ruhê ma yo azad vînî nêbeno. Naye ra, tarîxê zîndanan mîyanê tarîxê partîya ma de wayîrê cayêkê taybetî yo.”

Rojda Amede ard ziwan ke eke xoverdayîşê zîndanan nêbîyêne têgêrayîşê PKK’yî nêresayêne na derece û vat, “loma tarîxê zîndanan tena seba têgêrayîşê ma nê, seba şarê ma zî wayîrê muhîmîyêka pîle yo.”

Xoverdayîşê Grevê Vêşanîye Rayîrê Hemleyêka Tarîxîye ya Xoverdayîşî Akerd

Rojda Amede çetinîya prosesê nikayênî viste vîrî û vat, “Ma prosesêkê giranî de yê û hemverê hêrişanê hîrayan de xoverdayîşêk esto. Sere de Leyla Guvene, Nasir Yagiz, Fadîle Toke, merdimê ma yê welatperwerî ê xeylî herêmanê Kurdistanî û hemrayê ma yê zîndanan bi xurtî xover danê. Sewbîna di grûbê ke her yewa înan 15 kesan ra yena pê, hemrayanê ma zîndanan de dest bi rojeyê mergî kerdo. Bêguman no xoverdayîş seba ma xeylî manîdar o û bi wesîleya nê ez xoverdayoxan silam kena. Bi serkêşîya embaze Leyla Guvene ma dest bi prosesêkê neweyî kerd û ver bi xoverdayîşêkê pîlî game eşte. Çunke tecrîdkerdişê Rayberê ma ame şidênayene û hendî ne têgêrayîşê ma ne zî şarê ma eşkeno hemverê nê de xo pê bigêro.

Rayberê ma zîndan de yo û ganî azad bo. Xoverdayîşê zîndanan, Kurdistan û teberê Kurdistanî seba qedînayîşê tecrîdkerdişê Rayberê ma, rijnayîşê faşîzmî û azakerdişê Kurdistanî yo, loma ma xo ra bawer ê ke do bi ser bikewo. Dişmen çende hêrişanê xo bikero giran, ma hende xurt benê.”

Mayî Veng Danê Wijdanê Merdimîye yo ke Lal Bîyo

Rojda Amede bale ante serê çalakîyanê mayan û hêrişanê polîsanê Tirkî yê hemverê mayan û vat, “Ma vînenê ke mayê ma seba Rayberîye û domananê xo vejênê meydanan û hemverê nêheqîye de vengê xo kenê berz. Vengê înan pêroyê dinya de vila beno. Seba çî vengê xo kenê berz? Çunke rejîmo faşîst wijdanê merdimîye rê zulm keno û ê vanê, ‘Ma Kurdî Kurdê verênî nêyê, ma merdimê nezanî nêyê, m abi Rayber Apoyî bîyî zana, ma ê dir ê, ê dir ciwîyenê.’ Seba nê xoverdayîşî ma mayanê xo bi hurmet û minet silam kenê. Ma zanê ke mayê ma ercê ma yê tewr pîl ê.”

Rojda Amede ard ziwan destê ke hemverê mayan de derg benê, eslê xo de hemverê ercan de derg benê û ganî bêrê şikitene. Rojda Amede vat, “Ganî şarê ma Rayber Apo û ercanê xo rê wayîr vejîyo. Çunke wext wextê wayîrvejîyayîşê ercan o, erde xo yo. Wext wextê wayîrvejîyayîşê Rayberîye yo, wayîrvejîyayîşê şehîdan o.”

Rojda Amede peynî de vat ke her keso ke wayîrê wijdanî yo ganî tewrê prosesi bibo, tewrê xoverdayîşî bibo û vat, “Rind yeno zanayene ke wijdan peymeyê mucadeleyî yo. Eke ma ercanê mucadeleyê xo rê wayîr vejîyê a game ma do dişmenî zihîf kerê.”