Roniştişê bingeyî yê dewaya vera aktîvîstê kurdî Mehmet Çakasî Senatoyê Asayîşê Dewlete yê Mehkemeya Berze ya Herême ya Celle de ame kerdene.

Serdozgerîya Celle Çakas (44) sey endamê Partîya Karkeran a Kurdîstanî (PKK)  sûcdar kerd ke goreyê  madeyê 129a/b yê Qanûnê Ceza ''rêxistina terorî ya teberê welatî'' ya.

Înîsîyatîfanê Women Defend Rojava û Defend Kurdîstanî semedê paştdayîşî veng da û bi waştişê qefilnayîşê roniştişan û serbestverdayîşê akyîvîstî verê edlîye de mîtîngêk kerd.

Mehmet Çakas bi waştişê Almanya par peynîya serre de Mîlanoyê Îtalya de ame destbendkerdene. Emser destpêkê aşma adare de hetê Îtalya ra transferê Almanya bi û Zîndanê Hannoverî de yeno tepiştene.

Ewro akerdişê roniştişî de aktîvîsto kurd pê paştdayîşî û çapikan ame peşwazîkerdene. Mehmet Çakasî vat o wazeno mehkeme de kurdkî (kurmankî) qisey bikero.

Badê tespîtkerdişê nasnameyî hetê temsîlkara Serdozgerîye ra îdîaneme ame wendene. Mehmet Çakas bi sûcanê kesayetî nîno sûcdarkerdene. Yeno îdîakerdene ke mabênê serranê  2018-2021 Hannver û Bremen de sey endamê PKKyî falîyetî rayra berdî.

Avûkatanê Mehmet Çakasî Dr. Björn Elberling û Ulrich von Klinggräffî badê eşkerakerdişê îdîanemeyî ANFyî rê eşkerayîyêka kilme daye. Avûkat Elberlingî vat muwekîlê înan bi organzîkerdişê çalakîyan, tewrbîyayîşê aktîvîteyanê şînî û werêardişê keyeyanê kurdan yeno sûcdarkerdene. Avûkat Klinggräffî zî vat goreyê îdîanemeyî falîyetê fermî û çalakîyê demokratîkî sey sûcû yenê vînayene ke na nimûneyêka klasîke ya  sûchesibnayîşê çalakîya demokratîke ya vera atîvîstanê kurdan a.

Birayêkê Mehmet Çakasî zî mîtîng de qisey kerd û vat ê sey keyeyî pê paştîya birayê xo de yê û pê ey sereberz ê.

Înîsîyatîfanê Women Defend Rojava û Defend Kurdîstanî  zî bi ziwanê tûjî rexne kerd ke aktîvîstê kurdan almanya de yenê krîmînalîzekerdene. Eşkerayîye de ame vengdayene ke wa qedexeyê serê PKKyî bêro wedaritene û wa paştî bidîyo Rojawanî û Îdareyo Xoser bêro naskerdene.

Roniştişê Bînî

Tarîxê roniştişanê bînan wina yê: 18, 20, 27ê êlula 2023; 4, 10, 11ê teşrîna verên a 2023; 1, 7, 8, 21, 22, 28, 29ê teşrîna peyên a 2023; 5, 6, 12, 13, 19, 20ê kanûna 2023; 9, 10ê çeleya 2024î.

Adresê Mektûban

Mehmet Çakas kirdkî (zazakî) kumanckî, tirkî û biney almankî qisey keno. Adresê ci yê semedê mektûban wina yo: Schulenburger Landstr. 145, 30165 Hannover.