Grevê vêşanîye yê 4 aktîvîstanê Kurdan ê paytextê Almanya Berlînî dewam keno. Cemal Kobanê, Omer Bagdur, Mele Mustafa Tuzak û Şîyar Xelîl seba wedaritişê tecrîdkerdişê Rayberê Şarê Kurdî Abdullah Ocalanî bi qerardarîye xo ver ro danê. Serdanê seba çalakwanan zî dewam kenê.

Tewr peynî de tarîxnaso Alman Dr. Nîck Brauns, rojnameger Alexander Gorskî û pawitoxa heqanê merdiman a Îtalyayije Sveva Heartlere şîyî serdana çalakwanan. Dr. Brauns, Gorskî û Heartlere da zanayene ke ê paştdayîş danê xoverdayîşê vera tecrîdî û çalakwanan reyde xoşebere kerde.

Waştiştişê şima meşrû û biheq ê

Xoverdayoxanê grevê vêşanîye zî her hîrê roşinvîran rê sipas kerd ke ê ameyî serdana înan û ard ziwan ke, paştdayîşê înan bimana yo. Çalakwanan bi taybetî rayapêroyî ya Alman û Ewropa ra waşt ke hîratir xoverdayîşê vera tecrîdî rê wayîr bibejîyê.

Dr. Braunsî bi nameyê grube qisey kerd û ard ziwan ke, înan heta nika nêeşkayê vengê çalkawanan rind bidê heşnayene û wazenê na babete de rexnedayîşê xo biderê. Dr. Braunsî da zanayene, seba ke xoverdayîş û waştişê çalakwanan ê meşrû û biheqî çapemenîya Almanan, Îtalyayan û Ewropa de hîratir ca bigêrê, ê do cehd bikerê.

Dr. Braunsî vat, “Teyna medya de ney, ma do kuçe û meydanan de zî hemrayanê xo yê Kurdan reyde cehd bikerê û hîratir vengê şima bidê heşnayene. Amancê ma o yo ke rayapêroyî goş bida nê vengî ser û tecrîd bêro wedaritene.”

Endamanê heyetî peynîya serdane de çalakwanan rê deyîra “Çav Bella” vate.  Cemal Kobanê û Omer Bagdur 92 rojî, Mele Mustafa Tuzak 108 rojî, Şîyar Xelîl zî 95 rojî yo grevê vêşanîye de yo.