Roşnvîran û baroyanê Fransa pêgoşîya dewletan a seba Rojawanî yê verba hêrişanê îşxalkarîye rexne kerd û nameyêk Serekkomar Emmanuel Macronî ra erşawit.

Kampanya hetê sereko veren ê Yewîya Baroyan ê Parîsî Chrîstîan Charrîere Bournazelî ra ameye destpêkerdene û tayê kesayetanê namdaran zî paşt daye kampanya. Heta nika bi des hesaran kesan paşt da kampanya. Name Serekkomarê Fransa Emmanuel Macronî rê ame nuştene û huqûqnas Roland Dûmas zî bîyo ê kesan ra ke mora xo reya awil daye binê kampanya.
 

Name pêşkêşê rayaumûmîye ame kerdene û her kes eşkeno mora xo bide bin. Name de yena vatene ke “Seba muttefîqanê ma Kurdan tê bigêrê ke nika bîyî hedefê hêrişanê Tirkan.”

Name de yena vatene, “Macrono ke Fransa temsîl keno, seba ke nêrazîbîyayîş bimojne dewleta Tirkî,ganî çend domanî bimirî?” û Peymana Munchenî ameye vîrvistene ke serra 1938 de verda ke Almanyaya Nazî Çekoslovakya îşxal bike. Name de ame vîrvistene ke Hîtler bêro zerrîhera kerdene, muttefîqan o çax Munchenî de peymenêke mor kerde ke goreyê aye beşêkê erde Çekoslavakya ra teslîmê Hîtlerî ame kerdene û dima zî no tewir sey “Peymana Şermî” ame naskerdene. Dimayê nê tewirî bi des mîlyonan Ewropayijî merdî.

Name de ame mojnayene ke nê tawîzî pê bêvengîmendişê hêrişan ê Erdoganî nika reyna yenê pêşkêş kerdene.

Name de ame waştene ke Serekkomarîya Fransa seba Kurdan ganî tê bigêrê. Adirbirnayîşo ke mabênê DYA û dewleta Tirkî de ame morkerdene, zî maneno peymana Munchenî ke têna zerrîya Erdoganî hera kena.