Rozerîna Çukura 16 serre 8ê çeleyê 2016î de wextê xoverdayîşê xoîdarekerdişî de qezaya Sûrî ya Amedî de hetê sekbananê dewleta tirke ra amebî qetilkerdene..

Rozerîne serrgêra 8. ya qetilkerdişê ci de dewa Herîdanî ya qezaya Pîranî ya Amedî de serê gorê xo de ameye yadkerdene. Dadî û babîyê aye Fahrîye û Mustafa Çukur serê gorê kênaya xo de duayî wendî. Dadîya Rozerîne verar şîye kerraya gorê kênaya xo û bermaye.

Dayîke Fahrîye pare kerd ke 8 serrî verî a Rozerîne şawitbî dibistane û dima xebera mergê aye girewta.

 Dayîke Fahrîye vat: ''Kênaya mi waştêne biba doktore û şarê xo rê ardim bikera. La a ameye qetilkerdene. 8 serrî yo keyeyê mi de vengê to çin a. Kênaya mi 'terorîst' nîya. Destê aye de defter û qelemî est bîyî. Kênaya mi şehîda Kurdîstanî ya. Rozerîna mi ti şîya la nika bi hezaran Rozerînê mi est ê. Ez pê to sereberz a. Hem na dinya de hem zî axîret de ez do peyê dewaya to de biba. Heta ke ez weş biba do bêra serê gorê to. Wasîyetê min o ke eke ez bimira mi zî wa kişta to de defin bikerê.''