Têgêrayîşê Gemeinsam Kampfenî ra Rua Fitko derheqê Hemleya Abdullah Ocalanî rê Azadîye, Meseleya Kurdan rê Çareserîya Sîyasîye de ANFyî rê qisey kerd.

Rua Fitko ard ziwan ke paradîgmaya Konfederalîzmê Demokratîkî yê Rayberê Şarê Kurdî Abdullah Ocalanî seba famkerdişê krîzan girîng a û vat: ''Paradîgmaya Ocalanî teyna seba kurdan ney seba pêro mesleyanê Rojhelatê Mîyanênî û dinya çareserîyan pêşkêş kena û seba ke komelî meseleyanê xo ra bixelisê rayîrê çareserîye mojnena. Paradîgmaya Ocalanî rayîr dana ma ke ma xo sey kesayetî fam bikerê. Xêrê fikranê Ocalanî ra ma eşkenê xo newe ra pênase bikerê. Ocalan coka lîderêko girîng o.''

Rua bale ante ser ke fikrê Abdullah Ocalanî seba têgêrayîşê cinîyan zî zaf girîng ê û vat: ''Ocalan teyna nêvano ke wa cinîyî xo rêxistin bikerê. Ocalan wazeno ke cinîyî wa xo bişinasnê û fam bikerê. Serranê peyênan de dinya de têkoşînê cinîyan zaf zêdîya. Ma eşkenê  bi paradîgmaya Abdullah Ocalanî vera her tewirê polîtîkaya serê cinîyan cewab bidê.''

Rua Fitko îfade kerd ke şertê Zîndanê Îmraliyî qetî nênê qebulkerdene û vat: ''Seba azadîya Ocalanî nika hemleyêke est a. Na Hemleya Azadîye netîcfeya têkilîyanê peyênan ê bi komelan de dîyaye destpêkerdene. Na  hemle her çî ra ver cewab dana paradîgmaya Ocalanî. Ganî na hemle bêra pîlkerdene. Ganî Abdullah Ocalan hînî azad bibo. Şertê ke o tede yeno tepiştene qetî nênê qebulkerdene. Azadîya Ocalanî û azadîya cinîyan pabesteyê yewbînan ê.''