Hêrişanê dewleta tirke ya îşxalkere yê vera Rojawanî ra dima têgêrayîşê DAÎŞî Rojhelatê Mîyanênî û herême de zêdîyayî. Hemserekê PYDyî Salîh Muslimî derheqê têkilîya dewleta tirke ya bi DAÎŞî de ANFyî rê qisey kerd.

Salîh Muslîmî îfade kerd ke dewlete DAÎŞî sey hacetêkî seba menfaetanê xo şuxilnena û vat: ''Dewleta tirke seba çinkerdişê kurdan tim DAÎŞ şuxilna. Coka DAÎŞî verê xo da Kurdîstanî.  Xora Rojawan de peynîya serwerîya DAÎŞî ameye ardene la îdeolojîya DAÎŞî çin nêbîya. Wexto ke dewleta tirke hewce vînena DAÎŞî visnena dewre. Hema wextê rêxistinîya DAÎŞî de Tirkîya merdimê xo kerdî mîyanê DAÎŞî. Ebu Muslîm tirkmen bi. DAÎŞî Mûsil de bînaya serseferîye ya Tirkîya sey qerargehî şuxilnabî.  Dewleta tirke vana ke a vera DAÎŞî têkoşîn kena la çîyo winayên çin o. Dewleta tirke hema zî Rojawan de DAÎŞî şuxilnena. Hêrişanê DAÎŞî yê vera Xiwêranî de têkilîya DAÎŞ-Tirkîya bi belgeyan ameye îsbatkerdene. Heta ke dewleta tirke paştî bida DAÎŞî tehlukeyê DAÎŞî do nêqedo.''

Salîh Muslîmî da zanayene ke cerganê DAÎŞî yê ke hêrişê Rojawanî kerdo ê zafêr Tacîkistan, Kazakistan, Efganistanî ra yê û vat: ''No çi mojneno ke Tirkîya derheqê Asyaya Mîyanêne de zî wayîra planan a û wazena pêro herême têmîyan bikera. Tirkîya Asyaya Mîyanêne de zî paştî dana DAÎŞî. Eke cayêke de DAÎŞ est bo tede huzir do çin bo. DAÎŞ merdiman kişeno û şerê zereyî xorin keno. Estbîyayîşê DAÎŞî seba pêro Asyaya Mîyanêne û Rojhelatê Mîyanênî tehluke yo. Ma tim Koalîsyonê Mîyanneteweyî rê vanê ke ganî verê destekê seba DAÎŞî bêro girewtene. Koalîsyono Mîyanneteweyî zî bi xo zaneno ke Tirkîya paştî dana DAÎŞî la vera Tirkîya çew tênêgêreno.

Welatê Ewropa, Rûsya û Amerîka bi xo vanê ke Tirkîya paştî dana DAÎŞî. La rixmê ney zî bêveng ê. Çunke nê zî goreyê menfaetanê xo têgêrenê. Tirkîya DAÎŞî vera kurdan herême de şuxilnena. Mîsal Vakur de zî Huda Parî vera kurdan şuxilnena ke Huda Par zî sey DAÎŞî yo. Başûr de zî Tirkîya DAÎŞî vera kurdan şuxilnena. Yanî mabênê DAÎŞ û Tirkîya de têkilîyêka organîke est a. Coka bêvengîya vera têkilîyanê DAÎŞî û Tirkîya yena manaya bi adirî kaykerdişî. Dîyar nîyo ke no adir do kamca bivişno. Ganî Tirkîya rê sînorêk ronîyo. Bi destê DAÎŞî vera kurdan qirkerdişî yenê kerdene. La DAÎŞ teyna seba kurdan ney seba pêro herême tehluke yo. Ma hêvî kenê ke her kes kayanê Tirkîya bivîno û verê nê kayan bigêro.''