Samsun de tepişteyêk vîrusê Korona ra merd

Ame vatene ke tepişte Mehmet Yeter (70) Zîndanê Bafra yê Samsunî de hewteyêkî verê cû merd û bê hayîya keyeyê ci ame definkerdene.

Mehmet Yetero ke 3 serran ra nata zîndan de bi, hewteyê vîyarteyî de vîrusê Korona ra merd. Goreyê rojnameyê Cumhurîyetî 16ê adare de Yeter wedarîya Nêweşxaneyê Fakulteyê Tibî yê 19ê Gulane û 23ê adare de lingêka ci ameye cêrakerdene. 3 rojan ra dima Yeter ame taburcukerdene û erşawîya zîndan. La zîndan de reyan nêweş kewt û reyna sewqê nêweşxaneyî bi.

Dozgerê Komare Mudirîya Goristanan a Samsunî rê nuşteyêk erşawit û vat: ''Tepişteyê bi nameyê Mehmet Yeterî Covid-19î ra merd.'' Nuşteyî ra dima cenazaya Yeterî hetê ekîpanê Mudirîya Goristanan ra ameye definkerdene.

Lajê ey Ferhat Yeterî eşkera kerd ke înan xebera mergê babîyê xo îdareyê zîndanî ra girewte. Yeterî vat: ''Mergî ra panc rojî derbaz bibî la ne Zîndanê Samsunî ne zî dezgehêkê bînî xebere nêdaye ma û cenaza defin kerda. Tepişteyêkê bînî mi rê vat ke babîyê mi merdo.''