Hemserekê Pêroyî yê HDPyî Mîthat Sancarî taxa Yeşîlkoyî ya Hatayî ya ke molozê erdlerzî yê Samandagî tede yenê deverdayene de zîyaret kerde. 

Sancarî tîya de qisey kerd û pare kerd ke eke ê her ca de hêzê xo yew bikerê têkoşînê înan do ser bikewê. Sancarî vat: ''Ganî nika 14ê gulane de armancê ma bibo ke ma nê îqtîdarê talan, zulm û mergî bişawê. Ganî ma ney pîya bikerê. Ganî nê îqtîdarî reyde sîstem zî bêro vurnayene. Ma pîya welatêkê winayênî awan bikerê ke tede xoza û merdimî bieşkê pîya biciwîyê. Mexdûranê erdlerzî rê mesuldarîya ma ya ke ma ser bikewê. ''

Qiseykerdişê Sancarî ra dima şarî sloganê ''Vera molozan cuye bipawê'' vat.

Dima Sancarî û heyetê ci roniştoxanê taxa Gukderenî ya Hatayî de derheqê bira ''îstîmlakkerdişê bilêzî'' de qisey kerd. Hemwelatîyan da zanayene ke ê ameyê mexdûrkerdene û vera îstîmlakkerdişê erdê xo tewir mojna. Roniştoxan waşt ke Nêweşxaneyê Şaristanî serê erdê xezînaya dewlete de bêra viraştene.

Hemserek Sancarî goş na şarî ser û vat: ''Çira Gulderen weçînîyayo? Sebebê ci rant o. Îqtîdar nika ra kewt mîyanê hesabê rantî. Eke şarê Gulderen vera nê rantî bi xurtî vindero ma do paştî bidê înan. Ganî ma nê îqtîdarî bi pêro polîtîkayanê ci bişawo. Teyna Gulderen de ney pêro herêmanê erdlerzî de hesabê rantî est o. No îqtîdar hende zalim o. Ma do nê sîstemî bivurnê û pîya cuyêka newîye awan bikerê.''

Heyet dima ver bi Serînyol û Erzînî kewt rayîr.