Hemserekê Pêroyî yê HDPyî Mîthat Sancar Dêrsim de tewrê aktîvîteya yadkerdişê şehîdanê Terteleyê Dêrsimî bi. Xeylêk wekîl û îdarekarê partîye zî Sancarî reyde tewrê aktîvîte bîyî.

Sancar û heyetî hêver pîya rêxistina HDPyî ya bajarî zîyaret kerd û dima ra ver bi Meydanê Seyîd Rizayî rayra şîyî. Hêzê demokrasîyî û temsîlkarê partîyanê sîyasîyan ê Dêrsimî, Hemserekê Baroyî Kenan Çetin û Serekê Şaredarî Fatih Maçoglu û xeylêk kesî zî tewrê aktîvîteya yadkerdişî bîyî.

Sancarî şexsê Seyîd Rizayî de şehîdê terteleyî yad kerdî û  nê vatî: ''4ê Gulane roja reş a. Çîyê ke badê nê roje bîyî birîna reş a. Musa Anterî kitabêkê xo de wina vato. Bado ke 4ê Gulane de qerar ame girewtene planê qirkerdişî ame rayraberdene û tertele ame kerdene. Goreyê doneyanê fermîyan nizdê 14 hezar kesî ameyî qetilkerdene û nizdê 12 hezar kesî zî ameyî surgunkerdene. La xora ma zanê ewraqê fermî senî yenê amadekerdene. Goreyê şahîdanê terteleyî, înanê ke ê rojanê reşan de dej ant, 50-60 hezar kesî ameyî qetilkerdene. Ganî ma nê qirkerdişî xo vîr a mekerê. No zî bi têkoşînî beno. Sîstemê serdestî wazeno bido vîrakerdene. La seba ke înan medê vîrakerdene ganî ma têkoşîn bikerê.

Meseleya esasî aya ke zîhnîyetê ke no qirkerdiş afernayo ra hesab bêro persayene. Hesabpersayîş înşakerdiş o. Rayîrê edaletî heqîqetî ra ravêreno. Çoka ma zî sey waştişê heme hêzanê Dêrsimî wazenê ke wa hêver heqîqet vejîyo werte. Semedê naye ganî meclîs têbigêro, komîsyonêk rono. Wa heme arşîvî bêrê akerdene, çî senî bîyo bêro eşkerakerdene. Heta heqîqet mebo, edalet nêbeno, heta edalet mebo haştîye nêbena. Seba ke darbî bêrê piştene, birîna reşe bibo pak, ameyox bibo weş û cuya hempare bêro ronayene ganî qirkerdişî dir bêro têrî.

Ganî ozro fermî bêro waştene û herinda Tuncelî de nameyê Dêrsimî bêro şuxulnayene. Sey xeylêk cayanê bînan ê Kurdîstanî Dêrsim de zî merdeyê ma yê bêkefen û bêgor estê. Heta ke ê wina binê herre de bimanê serê herre huzur nêvîneno. Sere de Seyîd Riza, lajê ci û hemrayê ci ganî gorê heme kesanê ke ameyî qetilkerdene bêrê viraştene. Nê welatî înkarî ra zaf dej ant. Haştîya pîle wezîfeyê ma yo, hedef û deynê ma yo. Hêrişî dewam bikerî zî vateyê pîrê ma Seyîd Rizayî şîarê ma yo. Ma do verê kayanê înan de çok medê. Têkoşînê ma yo heqdar do ser bikewo. Xizir hemrayê ma bo.''

Sancar badê aktîvîteya Meydanê Seyîd Rizayî tewrê programê yadkerdişî yê Zinaranê Holvarî bi.