Partîya Çep a Keske çarçeweya weçînayîşanê 14ê gulane de qezaya Pirsûsî ya Riha  de mîtîng kerd. Hemserekê Pêroyî yê HDPyî Mîthat Sancar û Hemsereka Pêroyî ya DBPyî Salîha Aydeniz tewrê mîtîngî bîyî.

Programî bi rêzgirewtişî dest pêkerd û sloganê "Şehîd namirin" bîyî berz.  Dima ra namzedê Partîya Çep a Keske vejîyayî sehneyî ser. Gama ke Ferît Şenyaşar vejîya sehneyî ser vengê çapikan bi berz. Hemserekanê HDP û DBPyî hemşaredarî silam kerdî û dima ra hemserekanê pêroyî qisey kerd.

Hemsereka Pêroyî ya DBPyî Salîha Aydeniz vat: "Şarê Pirsûsî bi seran o semedê têkoşînê azadîye yê kurdan, ziwanê dayîke payan ser o û do dişmenê kurdan îqtîdarê AKP-MHPyî ra hesab biperso. Ma tîya ra xoverdayoxanê Kobanê, êyê ke Şorişê Rojawanî de ca genê, silam kenê. Êyê ke wayîrê felsefeya 'Jin, jiyan, azadî' yê rê bi hezaran silamî.  Pirsûs de vera keyeyê Şenyaşaran qirkerdiş ame kerdene. Êyê ke wayîrê nê qirkerdişî Riha de bîyî namzed. La şarê Riha do hesabê nê biperso, sindoq de paştî bidê cigêrayîşê azadîye yê Emîne Şenyaşar. Înanê ke vatêne 'Kobanê kewt do bikewo' tay mendo ke bi xo bikewê. No îqtîdaro faşîst haştîya birumetî ra terseno. Coka tecrîd xorî keno. La ewro heme dinya têkoşînê azadîye û haştî yê Abdullah Ocalanî vîneno. Ma zî do 14ê gulane de semedê şikitişê tecîrî raye bidê Partîya Çep a Keske. "

Hemserekê Pêroyî yê HDPyî Mîthat Sancarî vat: "Weçînitişê serekkomarîye muhîm o la goreyê ma  çareserkerdişê problemanê esasan pabesteyê bedilnayîşê serekkomarîye nîyo. Eslê xo de hêz û programê bedilnayîşê nê sîtemî ma de yo, Partîya Çep a Keske de yo. Gerek ma weçînitişê meclîsî de rayanê tewr zafan bigêrê. Semedê bedilnayîşê nê sîstemî gerek ma bi tewirêkê xurtî bikewê meclîsî. Semedê caardişê edaletî û hesabpersayîşî gerek ma Partîya Çep a Keske bi tewirêkê tewr xurtî bişawê Meclîsî."