Komeleya Mezûnanê Zanîngehê Rojhelatê Mîyanênî (ODTU), bi nameyê ''Xoşeberanê Weçînayîşî'' bernameyêk viraşt. Hemserekê HDPyî Mîthat Sancar, Namzetê Anqara yê Partîya Çep a Keske Emîralî Turkmen, Endamê Partîya Çep a Keske, SGP, ÎHD û wendekarê ODTUyî tewrê bernameyî bîyî.

Sancarî bername de qisey kerd. Sancarî ard ziwan ke heta ke îqtîdarê AKP-MHPyî nêşoro demokrasî do nêra û vat: ''Ma Îtîfaqê Kede û Azadîye hemkarîya têkoşînî ser o awan kerd. Îtîfaqê Kede û Demokrasî yê Kurdan zî proses de aktîf o. Ma do bikerê ke no îqtîdar bin bikewo, dewro newe dest pêbikero.

Ma nê îtîfaqî seba ameyoxî zî awan kerdî, teyna seba weçînayîşan ney. Coka ma lîsteya hempare ser o nîqaşî kerdî. Ma venga pêro şarê xo danê ke raya xo bi hawayêkê stratejîkî bidê. TÎP tay cayan de do bi amblemê xo bikewo weçînayîşan la nê cayî krîtîk ê. Beno ke ma wekîlanê xo zêde bikerê û beno ke ma destkewteyanê xo zî vînî bikerê. Mi gore ganî merdim girîngîye bido naye ser.

Weçînayîşanê parlamentoyî de hedefê ma se ra 15 o. Ma armanc kenê ke Meclîs de bibê hêzê dîyarkerî. Ganî ma tewr tay 100 wekîlan bişawê Meclîsî. Ma armanc kenê ke nê îqtîdar bişawê û cuyêka newî û demokratîke awan bikerê. Ma bi hêzê xo bawer ê. Ganî ma hêzê xo yew bikerê û nê îqtîdarî bişawê.''