Meclîsê Partîye (MP) yê HDPyî serekîya Hemserekan Pervîne Buldan û Mîthat Sancarî de Anqara de merkezê partîye de bi rojdemê kongreya îstîsnayîye ame pêser. 

Hemserekê Pêroyî yê HGPyî Mîthat Sancarî kombîyayîşê Meclîsê Partîye de rojdem ercna.

Sancarî bale ante ser ke krîzê ekonomîkî ra şar hînî nêeşkeno debara xo bikero û mîyanê tengîye de yo. Sancarî vîst vîrî ke Cûdî û Akbelen de darî yenê qirkerdene û pare kerd ke îqtîdar bi hişmendîya talan û rantî têgêreno. 

Sancarî vat: ''Dîyanetî waşt ke tewrê dewaya Kobanê bibo. Dîyanet bi nê hawayî xo keno dewamê hişmendîya DAÎŞî. Îqtîdar keno ke mîyanê komelî de hîsê binkewtişî awan bikero. Ma ney zanenê. Wa çew bêhêvî nêmano. Ma têkoşînê xo rê dewam kenê. Ma armanc kenê ke hîna bi zixmî serkêşîya muxalefetî bikerê.

Ma seba paştdayîş, fedakarî û destekê ci şarê xo ra minetdar ê. Ma sey HDPyî bedelê pîlî dayî û nika zî Meclîs de binê nameyê Partîya Çep a Keske de xoverdayîşî rê dewam kenê. Rojdemê ma yo verên kongreya HDPyî ya îstîsnayî ya. Ma do kongre de pîya nîqaşan bikerê û biran bigêrê. Ma kenê ke bi na kongre têkoşînê xo pîlêr bikerê, plan û metodanê xo serûber bikerê.''